HAMAS yaqin kunlarda Tramp rejasiga javob beradi

Harakat siyosiy byurosi aʼzosi Muhammad Nazzalning aytishicha, 30 sentabrda eʼlon qilingan reja boʻyicha falastinlik guruhlar, mustaqil faollar va vositachilar bilan maslahatlashuvlar olib borilmoqda.

«Bizning tanqidlarimiz koʻp, ammo masalaga jiddiy yondashyapmiz. Yakuniy qarorda falastinlik xalqning oliy manfaatlari va milliy ishning strategik tamoyillari hisobga olinadi», — dedi u.

Nazzal harakatning maqsadi vaqt bosimi emas, balki ikki yildan beri Gʻazoda davom etayotgan ommaviy qotilliklarni toʻxtatish ekanini taʼkidladi: «Biz qon toʻkilishi uchinchi yilga oʻtmasligini istaymiz».

Eslatib oʻtamiz, 29 sentabrda Tramp «Gʻazodagi mojaroni toʻxtatish boʻyicha kompleks reja»ni taqdim etgan edi. Hujjat 20 banddan iborat boʻlib, unda otashkesim, Isroil qoʻshinlarini bosqichma-bosqich chiqarish va asirlarni ozod etish nazarda tutilgan.

Isroil Bosh vaziri Binyamin Netanyahu rejani qoʻllab-quvvatlagan, Qatar va Misr esa uni HAMASga yetkazgan.