Isroil vaziri hukumatning Gʻazoga yordam berish qarorini «sharmandalik» deb atadi

Ben-Gvir oʻzining ijtimoiy tarmoqdagi sahifasida yozganidek, hukumat avval gumanitar yordamni toʻxtatish haqida qaror qabul qilgan, ammo oradan bir necha soat oʻtib uni bekor qilgan. Vazirning fikricha, Isroil qaytadan harbiy harakatlarni boshlashi va falastinliklarni Gʻazo sektori hududidan «majburiy koʻchirish» siyosatiga oʻtishi kerak.

Avvalroq Isroil hukumati Gʻazoga gumanitar yordam yetkazib berishni vaqtincha toʻxtatganini maʼlum qilgan edi, ammo bu qaror qisqa vaqt ichida qayta koʻrib chiqildi.

Shu bilan birga, Isroil HAMASni otashkesimni buzganlikda ayblab, Gʻazoning bir necha hududlariga havo hujumlarini amalga oshirdi. Isroil tomonining daʼvo qilishicha, HAMAS Rafah shahridagi harbiy kuchlarga hujum qilgan.

Bunga javoban HAMASning harbiy qanoti — «Izzaddin Qassom brigadalari» otashkesim shartlariga qatʼiy amal qilayotganini va Rafahdagi hodisalarga aloqasi yoʻqligini bildirdi. Ular Isroilning ayblovlarini asossiz deb atadi.

Ayni paytda Isroil bosh vaziri Binyamin Netanyahu HAMASni kelishuvni buzganlikda ayblab, Gʻazo sektorida «qatʼiy choralar koʻrish» boʻyicha topshiriq bergani aytilmoqda.

Falastin manbalarining maʼlum qilishicha, Gʻazoda HAMAS kuchlari bilan Isroil armiyasi qurollantirgan Yasir Abu Shebab guruhiga tegishli  tuzilmalar oʻrtasida toʻqnashuvlar sodir boʻlgan.