Исроил вазири ҳукуматнинг Ғазога ёрдам бериш қарорини «шармандалик» деб атади

Исроил миллий хавфсизлик вазири Итамар Бен-Гвир ҳукуматнинг Ғазо секторига гуманитар ёрдам етказишга қўйилган тақиқни бекор қилиш ҳақидаги қарорини кескин танқид қилди. Унинг таъкидлашича, бу қарор мамлакат учун «шармандалик»дир.

Жаҳон

20.10.2025, 12:05

Lotinchada

Улашиш:

Бен-Гвир ўзининг ижтимоий тармоқдаги саҳифасида ёзганидек, ҳукумат аввал гуманитар ёрдамни тўхтатиш ҳақида қарор қабул қилган, аммо орадан бир неча соат ўтиб уни бекор қилган. Вазирнинг фикрича, Исроил қайтадан ҳарбий ҳаракатларни бошлаши ва фаластинликларни Ғазо сектори ҳудудидан «мажбурий кўчириш» сиёсатига ўтиши керак.

Аввалроқ Исроил ҳукумати Ғазога гуманитар ёрдам етказиб беришни вақтинча тўхтатганини маълум қилган эди, аммо бу қарор қисқа вақт ичида қайта кўриб чиқилди.

Шу билан бирга, Исроил ҲАМАСни оташкесимни бузганликда айблаб, Ғазонинг бир неча ҳудудларига ҳаво ҳужумларини амалга оширди. Исроил томонининг даъво қилишича, ҲАМАС Рафаҳ шаҳридаги ҳарбий кучларга ҳужум қилган.

Бунга жавобан ҲАМАСнинг ҳарбий қаноти — «Иззаддин Қассом бригадалари» оташкесим шартларига қатъий амал қилаётганини ва Рафаҳдаги ҳодисаларга алоқаси йўқлигини билдирди. Улар Исроилнинг айбловларини асоссиз деб атади.

Айни пайтда Исроил бош вазири Биньямин Нетаняҳу ҲАМАСни келишувни бузганликда айблаб, Ғазо секторида «қатъий чоралар кўриш» бўйича топшириқ бергани айтилмоқда.

Фаластин манбаларининг маълум қилишича, Ғазода ҲАМАС кучлари билан Исроил армияси қуроллантирган Ясир Абу Шебаб гуруҳига тегишли тузилмалар ўртасида тўқнашувлар содир бўлган.

Жаҳон

20.10.2025, 12:05

Улашиш:

#исроил #Ғазо

мавзуга оид янгиликлар