Ummon Hormuz bo‘g‘ozida hujumga uchragan tanker ekipajini evakuatsiya qildi

Panama bayrog‘i ostida suzgan tanker seshanba kuni Ummonning Limah port shahridan 9 dengiz mili, ya’ni qariyb 17 kilometr uzoqlikda hujumga uchragan. Zarba oqibatida kemada yong‘in chiqqan.

Evakuatsiya qilingan ekipaj a’zolari Musandam gubernatorligidagi Xasab shahridagi shifoxonaga olib borilib, tibbiy yordam ko‘rsatilgan.

Hozircha hujum uchun javobgarlikni hech bir guruh o‘z zimmasiga olmagan.

Hindiston Tashqi ishlar vazirligi ma’lumotiga ko‘ra, kemadagi 19 ekipaj a’zosidan kamida 12 nafari jarohatlangan. Ularning 11 nafari Hindiston fuqarolari. Jami ekipajning 17 nafari ham hindistonlik bo‘lgan.

Hindiston hukumati mintaqadagi kemalarga qarshi hujumlardan jiddiy xavotir bildirgan va bunday hodisalarni zudlik bilan to‘xtatishga chaqirgan.

Ma’lumotlarga ko‘ra, so‘nggi bir hafta ichida Hormuz bo‘g‘ozida tankerlar bilan bog‘liq yana kamida yettita hodisa qayd etilgan.

Hujumlarga qaramay, Yaqin Sharqdan neft eksporti urushdan oldingi darajaga qaytgan. Kpler kompaniyasining dastlabki ma’lumotlariga ko‘ra, 30-sentabrda mintaqadan xom neft eksportining yetti kunlik o‘rtacha hajmi kuniga 18,3 million barrelni tashkil etgan. Urushdan oldingi 12 oyda bu ko‘rsatkich o‘rtacha 18 million barrel bo‘lgan.

Shu bilan birga, neft narxi yuqoriligicha qolmoqda. Seshanba kuni Brent markali neft fyucherslari bir barreli uchun 101,51 dollarga yetgan. Urush boshlanishidan bir kun oldin esa bu ko‘rsatkich 72,48 dollar edi.