Irlandiya bosh vaziri: “Falastinni tan olmagan davlatlar pozitsiyasini oʻzgartirishi zarur”

U ikki davlatli yechimni yagona haqiqiy yoʻl sifatida baholab, «Falastin va Isroilga tinch va adolatli kelajak taqdim etadigan yoʻl bu — ikki davlatli yechim», dedi. Biroq u vaziyatning yomonlashib borayotganini va barqaror tinchlik imkoniyati kamayib ketganini taʼkidladi.

Martin Irlandiyaning oʻzi 24 yil davom etgan ichki mojaroni boshidan kechirganini eslatib, hatto eng qiyin pallalarda ham umidni yoʻqotmaslik va muloqotni davom ettirish zarurligini qayd etdi.

U Gʻazo xalqining dardini chuqur his qilishini aytdi va Isroilning harakatlarini qoraladi:

«65 mingdan ziyod inson, jumladan 20 mingdan ortiq bola halok boʻldi. Oziq-ovqat qurolga aylandi, ochlik tarqaldi. Shifoxonalar, maktablar, tarixiy meros obʼektlari yoʻq qilindi. Hatto shifokorlar, gumanitar tashkilotlar xodimlari va jurnalistlar ham nishonga olindi. Bu holat koʻpchilik tomonidan genotsid sifatida atalmoqda», — dedi u.

Bosh vazir soʻzining yakunida Falastinni allaqachon tan olgan davlatlarga minnatdorlik bildirib, qolganlarini ham shunday qadam tashlashga chaqirdi:

«Hozir harakat qilish vaqti. Agar bugun ikki davlatli yechimni saqlab qolmasak, ertaga bunday imkoniyat umuman qolmasligi mumkin. Biz kelajak avlodlarga shunday meros qoldirishga haqli emasmiz».