“G‘azo bizniki”: Isroil vaziri har kecha G‘azoda 30–40 nafar falastinlikni o‘ldirishga chaqirdi

Isroilning o‘ta o‘ngchi milliy xavfsizlik vaziri Itamar Ben-Gvirning so‘zlariga ko‘ra, Isroil kuchlari G‘azoda har kecha “30 yoki 40 kishini o‘ldirishi” va “aynan o‘sha paytda xavf tug‘diradiganlar” bilan cheklanib qolmasligi kerak.

Ben-Gvir bu fikrlarni Isroil 2023-yil oktyabr oyida HAMAS boshchiligidagi hujumlardan so‘ng G‘azoda asirlikda saqlangan sobiq isroillik Rom Braslavskiy bilan suhbatda bildirgan.

“U yerda yashashga noloyiq odamlar bor. Ular yashamasligi kerak. Ular hatto odam ham emas”, – deya qo‘shimcha qildi Ben-Gvir G‘azodagi falastinliklarni o‘ldirishga chaqirar ekan.

Bu so‘zlar Bosh vazir Benyamin Netanyahuning koalitsion hukumatida o‘rin olgan hamda Isroil politsiyasi va qamoqxona xizmatlarini nazorat qiladigan Ben-Gvirning ko‘plab keskin bayonotlarining so‘nggisidir.

Mamlakat 27-oktyabr kuni bo‘ladigan saylovlarga yaqinlashar ekan, o‘ta o‘ngchi vazirning Isroildagi nufuzi ortib bormoqda.

Ben-Gvir Braslavskiyga Netanyahuning joriy “sulh” sharoitida G‘azodagi harbiy zarbalarni qisqartirish qaroriga qo‘shilmasligini, aksincha, nafaqat faol tahdid deb hisoblangan shaxslarga, balki undan kengroq doiradagi nishonlarga qarshi hujumlarni qayta boshlash tarafdori ekanligini aytdi.

Shuningdek, Ben-Gvir Braslavskiyga isroilliklarga qarshi qonli hujumlarda aybdor deb topilgan falastinlik mahbuslar qatl etilsa, bu jarayonda shaxsan ishtirok etishi uchun ruxsat berishga harakat qilishini aytdi. Yaqinda Isroilda o‘lim jazosi to‘g‘risidagi qonun qabul qilingan edi.

“Janob vazir, sizga shaxsiy iltimosim bor. Sizga chin dildan, ko‘zingizga tik qarab aytyapman. Menga ularni osishga ruxsat bering. Menga arqon emas, qurol tepkisi kerak. Isroil davlatidagi har bir terrorchini o‘z qo‘llarim bilan qatl qilaman” — dedi Braslavskiy Ben-Gvirga.

“Buni amalga oshirish uchun butun dunyoni ostin-ustun qilaman. Va’da beraman, buni amalga oshirish uchun qo‘limdan kelgan barcha ishni qilaman”, — deb javob berdi Ben-Gvir.

“G‘azo bizniki” 

Suhbatda Ben-Gvir falastinliklarni G‘azodan butunlay tark ettirib, Isroilni ushbu hududda yangi aholi punktlarini qurishga chaqirdi. Shuningdek, “butun G‘azoni o‘zimizniki deb bilishini” aytdi.

Xalqaro huquqshunoslar bunday ommaviy, majburiy yoki uyushtirilgan emigratsiya etnik tozalashga teng bo‘lishidan ogohlantirgan.

G‘azo Sog‘liqni saqlash vazirligi ma’lumotlariga ko‘ra, oktyabr oyida "o‘t ochishni to‘xtatish" kuchga kirganidan so‘ng ham Isroil zarbalari oqibatida G‘azoda 1250 dan ortiq odam halok bo‘lgan.

Ben-Gvir qonli hujumlarni amalga oshirishda aybdor deb topilgan falastinliklar uchun o‘lim jazosini standart qilib belgilashni yoqlab keladi. Bundan tashqari, Isroil qamoqxonalaridagi falastinlik mahbuslarning sharoitlarini qasddan yomonlashtirgani bilan ham maqtangan.

Ushbu faoliyati xalqaro tanqidlarga sabab bo‘lsa-da, unga qarshi jiddiy oqibatlarga olib kelmagan. Ben-Gvir Buyuk Britaniya va ayrim Yevropa Ittifoqi davlatlari tomonidan sanksiyaga uchragan, ammo bu uning xatti-harakatlariga ta’sir ko‘rsatmagan.