Isroil hujumi natijasida halok boʻlgan jurnalistlar soni 6 nafarga yetdi

Gʻazo hukumat Media-ofisining maʼlum qilishicha, oʻtgan tun Isroil qoʻshinlari matbuot xodimlari joylashgan chodirga zarba berdi va natijada qurbonlar soni olti nafarga yetdi. Ular orasida Sahat mediaplatformasi muxbiri Muhammad al-Xolidiy ham bor.

Bayonotga koʻra, al-Xolidiy “Ash-Shifo” shifoxonasi yonida matbuot xodimlari uchun qoʻyilgan chodirni Isroil kuchlari toʻgʻridan-toʻgʻri oʻqqa tutgani natijasida halok boʻlgan oltinchi jurnalistdir.

7 oktabr 2023 yildan buyon Gʻazo sektorida Isroilning hujumlari natijasida halok boʻlgan jurnalistlar soni 238 nafarga yetdi.

Avvalroq xabar berilganidek, “Ash-Shifo” yaqinidagi hujumda Al Jazeera muxbirlari Anas ash-Sharif va Muhammad Qurayka hamda uch operator halok boʻlgan. Isroil armiyasi ash-Sharifning oʻlimi uchun javobgarligini tan olgan, ammo uni “HAMAS yacheykasi rahbari” va “Isroilga raketa hujumlari rejasini tuzgan” deb daʼvo qilgan.