Pekindagi baland binoga kichik samolyot urildi

27-iyun kuni kichik samolyot Xitoy poytaxtidagi osmono'par binoga urildi. Bu dunyoning eng kuchli qo‘riqlanadigan shaharlaridan birida sodir bo‘lgan hayratlanarli voqeadir.

Ijtimoiy tarmoqlarda tarqalgan va Pekinda olingan kadrlarda “China Zun” nomi bilan ham mashhur bo‘lgan 109 qavatli CITIC Tower binosidan parchalangan bo‘laklar qulagani, shuningdek, yerda yotgan samolyotning dum qismi va taksining singan oynasi aks etgan.

Voqea joyiga ko‘plab politsiya xodimlari jalb qilingan, binoga olib boruvchi ayrim yo‘llar avtomobillar uchun yopib qo‘yilgan.

Baland qavatdagi ikkita oyna paneli shikastlangan.

Bino yaqinida to‘planganlar orasida turgan kuryerning aytishicha, u mahalliy vaqt bilan soat 18:00 atrofida yaqin joydan qattiq gumburlagan ovozni eshitgach, CITIC minorasi tomon shoshilgan, minoraga taxminan avtomobil kattaligidagi uchuvchi apparat kelib urilgan.

Politsiya tasvirlarni o‘chirtirmoqda

Kuryer yigitning aytishicha, u binodan chiqib turgan samolyotni videoga olgan, biroq keyinroq politsiya qo‘liga tushishdan qo‘rqib, uni o‘chirib tashlagan.

Voqea joyiga yetib borgan Reuters jurnalistlarining xabariga ko‘ra, o‘nlab politsiya va bir nechta o‘t o‘chirish mashinalari yaqin atrofdagi yo‘llarda saf tortib turibdi.

Politsiya odamlarni binodan uzoqlashtirib, ularning suratga olishiga qarshilik ko‘rsatmoqda. Allaqachon olingan tasvirlarni esa o‘chirishni talab qilgan.

Juma kuni bino haqidagi postlar Xitoy ijtimoiy tarmoqlaridan zudlik bilan olib tashlandi.

“Xiaohongshu” yoki “Red Note” ilovasida bino nomi qidirilganda faqat payshanba kungi yozuvlargina chiqmoqda.

Politsiya “Reuters” jurnalistlariga u yerdan ketishni buyurgan. Sababini so‘rashganida, “Sababini hammamiz yaxshi bilamiz!” – deb javob bergan xodim.