Rossiyaning Kiyevga falokatli hujumi: qurbonlar 13 taga yetdi

Rossiya 2-iyul kuni tong saharda Ukraina poytaxti Kiyevga yuzlab dronlar va o‘nlab raketalar bilan hujum qildi.

Hujum oqibatida turar joy binolari vayron bo‘ldi, kamida 13 kishi o‘ldi. Ko‘plab odamlar jarohatlandi.

Bu Rossiya tomonidan joriy yilda Kiyevga qilgan eng falokatli ikkinchi hujumdir.

"Rossiya Ukrainaga yana bir bor keng ko‘lamli shafqatsiz hujum uyushtirdi. Dushman o‘nlab ballistik raketalar uchirdi. Eng ko‘p jabr ko‘rgan Kiyev bo‘ldi. Hozirga qadar 13 kishining halok bo‘lgani ma’lum".— dedi Bosh vazir Yuliya Sviridenko.

Prezident Volodimir Zelenskiy 1-iyul kuni Dublinga tashrifini qisqartirib, ukrainaliklarni yaqinlashayotgan zarba haqida ogohlantirgan edi.

Ukraina Harbiy-havo kuchlari xabariga ko‘ra, Rossiya 74 ta raketa va 496 ta dron uchirgan.

Havo hujumidan mudofaa bo‘linmalari ularning aksariyatini urib tushirgan, biroq 25 ta ballistik raketa va 12 ta dron 33 ta manzilga zarba bergan.

Rossiya Mudofaa vazirligi uzoq masofaga uchuvchi yuqori aniqlikdagi qurollar hamda dronlar yordamida keng ko‘lamli hujum amalga oshirilganini, unda  Ukrainadagi harbiy va energetika obyektlari, shuningdek, aeroportlar nishonga olinganini ma’lum qildi.

Kiyevda motam

Ukraina Tashqi ishlar vaziri Andriy Sibihaning ta’kidlashicha, poytaxt dahshatli tunni boshdan kechirgan.

Kiyev meri Vitaliy Klichko juma kunini motam kuni deb e’lon qildi. Uning so‘zlariga ko‘ra, qariyb 3 million aholi istiqomat qiladigan butun shahar bo‘ylab talafotlar qayd etilgan.

Shahar rasmiylariga ko‘ra, jarohatlanganlar soni 90 nafarga yaqin. Ular orasida bolalar, tez yordam feldsherlari va haydovchilari ham bor. Shuningdek, ayrim odamlar vayron bo‘lgan turar joy binolari ichida qolib ketgan.

Rossiyaga bosimni oshirish kerak

Ukraina bir necha yillardan buyon Rossiyaning to‘xtovsiz uzoq masofali hujumlarini qabul qilib keldi. Biroq so‘nggi oylarda Kiyev ham Rossiya hududining ichkarisiga, asosan, energetika obyektlariga zarbalarni kuchaytirdi.

Oqibatda Rossiyada yoqilg‘i inqirozi yuz berdi. Dunyoning uchinchi yirik neft qazib oluvchi davlati Hindiston kabi uzoq o‘lkalardan benzin import qilishga majbur bo‘ldi.

Bunga javoban Rossiya Ukraina shaharlariga havo hujumlarini yanada kuchaytirib, o‘tgan oyda har ikki mamlakat pravoslav dinining poydevori sanalgan Kiyevdagi ming yillik soborga ham zarba berdi.

Yevropa Ittifoqining tashqi siyosat bo‘yicha rahbari Kaya Kallasning ta’kidlashicha, Ukrainaga harbiy yordamni uzluksiz davom ettirish va Moskvaga bosimni kuchaytirishgina Rossiya hujumlarini to‘xtata oladi.

"Zarbalarga javoban Rossiyaning harbiy-sanoat majmuasini dastaklayotgan yana ko‘plab tashkilotlarga qarshi sanksiyalar joriy etishni taklif qilaman. Moskva tinch aholiga qanchalik ko‘p hujum qilsa, sanksiyalar ham shunchalik ko‘paytirilishi kerak”, — deya yozdi u X platformasidagi postida.

Tinch aholi hujumlar markazida

Zelenskiy to‘rt yildan ortiq davom etayotgan urushni tugatish maqsadida Vladimir Putinga yuzma-yuz muzokaralar o‘tkazishni taklif qilgan, ammo Kreml rahbari bundan bosh tortmoqda.

Rossiya 2022-yil fevralida Ukrainaga bosqinni boshlaganidan buyon Kiyev va boshqa shaharlarga berilgan zarbalar oqibatida minglab ukrainalik tinch aholi vakillari halok bo‘ldi.

Moskva tinch aholiga ataylab hujum qilayotganini inkor etadi. Biroq o‘zi fuqarolik infratuzilmasi deb ataydigan obyektlarga qilingan hujumlarni qonuniy deb hisoblaydi. Chunki bu harakat Ukrainaning harbiy salohiyatiga putur yetkazadi.

Kiyev ham o‘z navbatida Rossiya va Rossiya bosib olgan Ukraina hududlariga kichikroq miqyosda zarbalar bergan.