Tramp telefon orqali Putin va Zelenskiy bilan suhbatlashdi

14-iyun kuni Rossiya prezidenti Vladimir Putin va Ukraina prezidenti Volodimir Zelenskiy bilan alohida-alohida telefon orqali suhbatlashdi Donald Tramp.

Putin bilan suhbat

Rossiya prezidenti yordamchisi Yuriy Ushakovning jurnalistlarga ma’lum qilishicha, Putinning Tramp bilan suhbati bir soatga yaqin davom etgan.

Ushakovning so‘zlariga ko‘ra, Tramp Ukraina masalasida harbiy harakatlarni to‘xtatish zarurligini ta’kidlab, bu maqsad yo‘lida Yevropadagi ittifoqchilarga va Kiyevga ta’sir o‘tkazishga tayyorligini bildirgan.

Shuningdek, Tramp Rossiyadagi tinch aholi obyektlariga berilgan so‘nggi zarbalar kelishuvga erishishni murakkablashtirayotganini ta’kidlagan. Ammo Oq uy buni tasdiqlamadi va qo‘ng‘iroq yuzasidan izoh bermadi.

O‘z navbatida Putin Kiyevning Rossiya fuqarolik infratuzilmasiga hujumlari Ukrainaning jang maydonidagi mavqeyini o‘zgartirmasligini va agar Zelenskiy u bilan uchrashishni istasa, “Moskvaga kelsin”, deganini ma’lum qildi Ushakov.

Zelenskiy bilan suhbat

Zelenskiy Telegram orqali e’lon qilgan bayonotida Tramp bilan “ajoyib suhbat” qurganini ta’kidladi.

Ukraina prezidenti Trampni tug‘ilgan kuni bilan tabriklash bilan birga, AQSh prezidentiga Ukrainani qo‘llab-quvvatlagani uchun minnatdorchilik bildirdi.

Zelenskiyning aytishicha, ular tinchlikni yaqinlashtirishga nima yordam bera olishini muhokama qilgan. Shuningdek, Zelenskiy Trampga Ukrainaning sharqiy front chizig‘idagi pozitsiyalari yaxshilanib, mustahkamlanib borayotgani haqida ma’lumot bergan.

“Katta yettilik” sammitidagi uchrashuvimiz chog‘ida bu masalalarni batafsilroq muhokama qilishga kelishib oldik”, — dedi u.

Bu qo‘ng‘iroqlar Tramp yakshanba oqshomida Oq uy maydonida UFC jangini o‘tkazib, tug‘ilgan kunini nishonlashga hozirlanayotgan bir paytda amalga oshirildi.

Tadbir yakunlangach, Tramp G7 sammiti uchun Fransiyaga uchib ketishi rejalashtirilgan. Sammitda Ukraina asosiy muhokama mavzusi bo‘lishi va yig‘ilishga Zelenskiy ham qo‘shilishi kutilmoqda.

Rossiyaga zarbalar

Diplomatik muzokaralar davom etayotgan janglar fonida bo‘lib o‘tdi. Yakshanba kuni Ukraina dronlari hujumi oqibatida Rossiyaning Oryol viloyati markazidagi turar-joy binosida bir kishi halok bo‘lib, yana to‘qqiz kishi jarohatlandi.

Mahalliy hokimiyat xabariga ko‘ra, yakshanba kuni Rossiyaning Bryansk viloyatida sodir bo‘lgan yana bir dron hujumida bir kishi o‘lgan.

Boshqa bir dron hujumi Ukraina chegarasidan qariyb 440 mil uzoqlikdagi Rossiyaning Yaroslavl viloyatida joylashgan yoqilg‘i saqlash omborlariga zarba berib, yong‘inlar keltirib chiqargan. Zelenskiyning ta’kidlashicha, ushbu zarba bosqinchi davlatning zaxirasi uchun muhim bo‘lgan neft obyektiga qaratilgan.

Rossiya neft tankeri ushlandi

14-iyun kuni Britaniya kuchlari La-Mansh bo‘g‘ozida Rossiyaning urush bilan bog‘liq sanksiyalarni chetlab o‘tish uchun foydalanadigan “soya flotiga” mansub deb gumon qilingan kemani qo‘lga oldi.

“Ushbu operatsiya Rossiyaga yana bir zarba beradi va Putinning Ukrainadagi urushini avj oldirayotganlarga yashirina olmasliklarini eslatadi”, - dedi Buyuk Britaniya bosh vaziri Kir Starmer