Tramp: Avstraliya eronlik ayol futbolchilarga boshpana berish kerak

Bu haqda ABC News xabar berdi.

Eronlik besh nafar ayol futbolchi — Fotima Pasandide, Zahro Ganbari, Zahro Sarbali, Otifa Ramazonzoda va Mona Hamudiy mart oyi boshida ayollar oʻrtasidagi Osiyo kubogining ochilish oʻyinida Janubiy Koreyaga qarshi bahsdan avval Eron davlat madhiyasini kuylashdan bosh tortgan edi.

Ushbu harakatdan soʻng sportchilar Eron davlat OAV tomonidan keskin tanqidga uchradi. Jamoaning ushbu besh nafar aʼzosi Gold Coast shahridagi mehmonxonada oʻz nazoratchilaridan qochib ketishga muvaffaq boʻlgan va hozirda Queensland politsiyasi himoyasida xavfsiz joyda qolmoqda. Faollar va sportchilarning yaqinlariga koʻra, agar ular vataniga qaytsa, shafqatsiz taʼqiblar, hatto oʻlim jazosiga duchor boʻlishi mumkin.

Tramp oʻzining Truth Social platformasida Avstraliya bosh vaziri Anthony Albanesega qarata ochiq murojaat yoʻlladi.

«Avstraliya Eron ayollar milliy futbol jamoasiga Eronga qaytishga ruxsat berib, dahshatli gumanitar xatoga yoʻl qoʻymoqda, u yerda ular oʻldirilishi mumkin», — deb yozdi AQSh prezidenti Truth Social ijtimoiy tarmogʻida.

Agar Avstraliya sportchilarga boshpana bermasa, buni AQSh amalga oshiradi, dedi Donald Tramp. Uning soʻzlariga koʻra, u Avstraliya bosh vaziri bilan shu mavzuda suhbatlashgan.

New South Wales shtatining qullikka qarshi kurash boʻyicha komissari James Cockayne jamoaning qolgan aʼzolariga nisbatan «zamonaviy qullik» alomatlari borligini tekshirishni talab qildi. Uning aytishicha, futbolchilarga mehmonxonadan kuzatuvchilarsiz chiqish taqiqlangan, ularning soʻz va harakat erkinligi cheklangan.

«Eron hukumati sportchilar va ularning oilalariga tahdid qilib, siyosiy muxolifatni bostirish uchun ulardan foydalanishi barchaga maʼlum», deya qoʻshimcha qildi Cockayne.

Eronning soʻnggi shohi oʻgʻli va surgundagi valiahd shahzodasi Rizo Pahlaviy ham Instagram’da ushbu sportchilarni qoʻllab-quvvatladi. U besh nafar ayol futbolchi jamoa lagerini tark etib, xavfsiz joyga oʻtganini va «Eron milliy sher va quyosh inqilobi»ga (Lion and Sun Revolution) qoʻshilganini eʼlon qildi.