Lazerli vositalardan noqonuniy foydalanish javobgarlikka sabab boʻladi

Portativ lazerli nur tarqatuvchi vositalar muomalasini tartibga solish, shuningdek, portativ lazerli nur tarqatgichlarning qonunga xilof muomalasi uchun javobgarlikni belgilash maqsadida Oliy Majlis Qonunchilik palatasining bir guruh deputatlari tomonidan “Oʻzbekiston Respublikasining Maʼmuriy javobgarlik toʻgʻrisidagi kodeksiga qoʻshimchalar kiritish haqida”gi qonun loyihasi ishlab chiqildi.

Mazkur hujjat loyihasi bugun Xalq demokratik partiyasi fraksiyasining yigʻilishida birinchi oʻqishda koʻrib chiqildi. 

Taʼkidlanganidek, lazerli nur tarqatgichlarni Oʻzbekistonga qonunga xilof ravishda olib kirish va ulardan foydalanish holatlarining koʻpayishi fuqarolar hayoti va sogʻligʻiga, havo kemalari parvozlarining xavfsizligiga hamda jamoat tartibiga yuqori darajada tahdid tugʻdirmoqda.

Taklif etilayotgan qonun loyihasi bilan yuqorida qayd etilayotgan noxush holatlarning oldini olish maqsadida qonunga rioya etmaganlarni tegishli tartibda javobgarlikka tortish masalasi nazarda tutilmoqda. 

Lazerli nur tarqatish vositalarini havo kemalari parvozlari vaqtida ularga qaratish va shu orqali ularning xavfsizligiga tahdid solish holatlari uchun amaldagi qonunchiligimizda maʼmuriy va jinoiy javobgarlik belgilangan. Ammo bu vositalar yoʻlda transport haydovchisining koʻziga qaratilsa, ogʻir oqibatlarga olib kelishi mumkin. Shu bois lazerli nur tarqatish vositalarini qonunga xilof ravishda Oʻzbekiston hududiga olib kirganlik, ulardan notoʻgʻri foydalanganlik, noqonuniy saqlaganlik uchun javobgarlik belgilanmoqda. 

Bu harakatlarning ijtimoiy xavflilik darajasiga qarab, maʼmuriy jarimalar koʻzda tutilmoqda. Masalan, lazerli nur tarqatish vositalaridan qonunga xilof ravishda foydalansa, bazaviy hisoblash miqdorining (BHM) 15 baravaridan 25 baravarigacha, bu vositalarni ishlab chiqarish, tayyorlash va saqlash kabi harakatlar uchun esa BHMning 15 baravaridan 30 baravarigacha, uni Oʻzbekiston hududiga olib kirganlik uchun esa BHMning 25 baravaridan 50 baravarigacha miqdorda jarima jazosi qoʻllanilishi koʻzda tutilmoqda. 

Bu oʻrinda taqiqlangan, qonunga xilof ravishda qoʻllaniladigan lazerli vositalar haqida gap ketyapti. Chunki bugungi kunda koʻpgina sohalarda lazerli nur tarqatish vositalaridan foydalaniladi. Tibbiyotda, sanoatda foydalaniladigan, ammo Oʻzbekistonda ishlab chiqarilmaydigan ayrim uskunalarni Oʻzbekistonga olib kirish uchun davlat bojidan ozod qilish holatlari qonunchilikda belgilangan. Faqatgina qonunchilikda belgilangan tartib-qoidalarni buzgan holda, qonunga xilof ravishda bu vositalarni olib kirish va foydalanish uchun javobgarlik koʻzda tutilmoqda. 

Qonun loyihasining qabul qilinishi lazerli nur tarqatish vositalaridan noqonuniy foydalanish va noxush holatlarning oldini olishga xizmat qiladi.