“100 yevroga 1 ta Pikasso” – Parijda yangi xayriya lotereyasi o‘tkazilmoqda

Tashkilotchilar dunyoning eng mashhur rassomlaridan birining asarini xususiy kolleksionerga emas, balki oddiy xalqqa sovrin sifatida taqdim etmoqda.

Parijdagi “Christie’s” auksion uyida bo‘lib o‘tadigan qur’a tashlash marosimi ishtirokchilarga Pablo Pikasso asarini atigi bitta chipta narxida qo‘lga kiritish imkoniyatini beradi.

Tashabbus 120 000 tagacha chipta sotishni rejalashtirgan.

Agar barcha chiptalar sotilsa, lotereya 12 million yevrogacha daromad keltirishi mumkin. Bu mablag‘ning 1 million yevrosi rasm egasi bo‘lgan Opera galereyasiga beriladi.

Qolgan qismi esa Alstgeymer tadqiqot jamg‘armasi tomonidan Fransiyaning yetakchi shifoxona fondlaridan biri orqali kasallikka oid tadqiqotlarni qo‘llab-quvvatlashga yo‘naltiriladi.

Bu yilgi mukofot

Joriy yil sovringa Pikassoning 1941-yilda qog‘ozga guash uslubida ishlangan “Ayol boshi” asari qo‘yilmoqda.

Ushbu portret rassom ijodining so‘nggi davriga, ya’ni uning ilk kubizm tajribalaridan o‘nlab yillar keyingi paytlarga oid.

"Pikasso" lotereyasi: avvalgi o‘yinlar

Avvalgi o‘yinlarga ham Pikasso asarlari qo‘yilgan. 2013-yilda o‘tkazilgan birinchi lotereyada pensilvaniyalik oddiy ishchi 1914-yilda chizilgan “Operadagi shlyapali odam” asarini yutib olgan.

2020-yildagi ikkinchi o‘yinda esa 1921-yilda moybo‘yoqda ishlangan “Natyurmort” kartinasi italiyalik hisobchiga nasib etdi. 

2020-yildagi ushbu asar milliarder kolleksioner Devid Naxmaddan olingan bo‘lib, o‘sha vaqtda u Pikassoning o‘zi ham asarlarini lotereyaga qo‘yish g‘oyasini qo‘llab-quvvatlagan bo‘lardi, deb ta’kidlagan.

“Pikasso juda saxiy inson edi. U asarlarini haydovchisiga, tikuvchisiga ham hadya qilardi. Rassom o‘z yaratiqlari faqat boylar tomonidan emas, balki har xil toifadagi odamlar tomonidan to‘planishini istardi”. – degan Nahmad.

Tashkilotchilarning so‘zlariga ko‘ra, jami 10 million yevrodan ortiq mablag‘ to‘plagan avvalgi ikki lotereya Livandagi madaniy tashabbuslarni hamda Afrikaning ayrim hududlaridagi suv ta’minoti va gigiyena dasturlarini moliyalashtirgan. 

Yutuqli o‘yin 14-aprel, seshanba kuni kechqurun Parijda bo‘lib o‘tadi.