“100 еврога 1 та Пикассо” – Парижда янги хайрия лотереяси ўтказилмоқда

Ташкилотчилар дунёнинг энг машҳур рассомларидан бирининг асарини хусусий коллекционерга эмас, балки оддий халққа соврин сифатида тақдим этмоқда.

Париждаги Christie’s аукцион уйида бўлиб ўтадиган қуръа ташлаш маросими иштирокчиларга Пабло Пикассо асарини атиги битта чипта нархида қўлга киритиш имкониятини беради.

Ташаббус 120 000 тагача чипта сотишни режалаштирган.

Агар барча чипталар сотилса, лотерея 12 миллион еврогача даромад келтириши мумкин. Бу маблағнинг 1 миллион евроси расм эгаси бўлган Opera галереясига берилади.

Қолган қисми эса Алтсгеймер тадқиқот жамғармаси томонидан Франциянинг етакчи шифохона фондларидан бири орқали касалликка оид тадқиқотларни қўллаб-қувватлашга йўналтирилади.

Бу йилги мукофот

Жорий йил совринга Пикассонинг 1941 йилда қоғозга гуашь услубида ишланган “Аёл боши” асари қўйилмоқда.

Ушбу портрет рассом ижодининг сўнгги даврига, яъни унинг илк кубизм тажрибаларидан ўнлаб йиллар кейинги пайтларга оид.

“Пикассо” лотереяси: аввалги ўйинлар

Аввалги ўйинларга ҳам Пикассо асарлари қўйилган. 2013 йилда ўтказилган биринчи лотереяда пенсилваниялик оддий ишчи 1914 йилда чизилган “Операдаги шляпали одам” асарини ютиб олган.

2020 йилдаги иккинчи ўйинда эса 1921 йилда мойбўёқда ишланган “Натюрморт” картинаси италиялик ҳисобчига насиб этди. 

2020 йилдаги ушбу асар миллиардер коллекционер Девид Нахмаддан олинган бўлиб, ўша вақтда у Пикассонинг ўзи ҳам асарларини лотереяга қўйиш ғоясини қўллаб-қувватлаган бўларди, деб таъкидлаган.

“Пикассо жуда сахий инсон эди. У асарларини ҳайдовчисига, тикувчисига ҳам ҳадъя қиларди. Рассом ўз яратиқлари фақат бойлар томонидан эмас, балки ҳар хил тоифадаги одамлар томонидан тўпланишини истарди”. – деган Наҳмад.

Ташкилотчиларнинг сўзларига кўра, жами 10 миллион евродан ортиқ маблағ тўплаган аввалги икки лотерея Ливандаги маданий ташаббусларни ҳамда Африканинг айрим ҳудудларидаги сув таъминоти ва гигиена дастурларини молиялаштирган. 

Ютуқли ўйин 14 апрель, сешанба куни кечқурун Парижда бўлиб ўтади.