Ukraina dronlari Tula viloyatida ikki kishini o‘ldirdi, Kiyevda 8 kishi yaralandi

Ukraina dronlarining tungi hujumi oqibatida Rossiyaning Tula viloyatida ikki kishi halok bo‘ldi, yana uch kishi yaralandi. Bu haqda viloyat gubernatori Dmitriy Milyayev xabar qildi.

Hujum oqibatlari Rossiyaning boshqa hududlarida ham qayd etilgan. Saratov shahrida Ukraina dronlari Ozon kompaniyasining logistika markazida yong‘in chiqishiga sabab bo‘lgan. Kompaniya ma’lumotiga ko‘ra, hodisada qurbonlar yo‘q.

Kiyevda sakkiz kishi yaralandi

Rossiya kuchlarining Kiyevga bergan havo zarbalari oqibatida esa sakkiz kishi jarohatlangan. Zarbalardan keyin to‘qqiz qavatli turar joy binosida yong‘in chiqqan, binoning ayrim oynalari sinib tushgan.

Rossiya va Ukraina urush davomida qasddan tinch aholini nishonga olishini rad etib kelmoqda.

Hujumlar AQSh vositachiligidagi tinchlik muzokaralari bo‘yicha diplomatik urinishlar davom etayotgan bir paytda sodir bo‘lmoqda.