Mushukni derazadan otgan oʻqituvchi jarimaga tortildi

Qayd etilishicha, voqea joriy yilning 27 sentabr kuni soat 17:30 lar atrofida Uchtepa tumanidagi 62-sonli umumtaʼlim maktabida kuzatilgan. Maktabning 7-"G" sinf oʻquvchilari ona tili darsiga oʻzboshimchalik bilan mushuk olib kirgan. Buni kuzatgan oʻqituvchi D.X. oʻquvchilarni dars mashgʻulotlari paytida chalgʻimasliklari uchun mushukni derazadan tashlab yuborgan. 

"Mushuk veterinar shifokor koʻrigidan oʻtkazilgan. Unga jiddiy jarohat yetmagan. Bu voqeadan soʻng maktab maʼmuriyati tomonidan yigʻilish oʻtkazildi. Oʻqituvchi hamda oʻquvchilarga atrof-muhit, tabiat asrab-avaylash barchaning burchi ekanligi tushuntirildi", deyiladi boshqarmasi izohida. 

"Ekolog" JB volontyorlari esa oʻqituvchini javobgarlikka tortish uchun sudga berdi.. Uchtepa tuman sudi uni Maʼmuriy javobgarlik toʻgʻrisidagi kodekskning 111-moddasiga koʻra, 375 ming soʻmga jarimaga tortgan.

"Bu juda ham kam, zero D.X. nafaqat bitta jonivorning oʻlimiga sabab boʻldi, eng yomoni bolalarning ruhitiga katta salbiy taʼsir koʻrsatdi. Fikrimizcha, u pedagoglik faoliyat olib borishga loyiq emas!", deyiladi "Ekolog.uz"ning Telegram-kanalida chiqqan xabarda.

Avvalroq Surxondaryo viloyati Denov tumani "Yangikuch" mahallasida istiqomat qiluvchi fuqarolar choʻl toshbaqasiga nos chektirganini tasvirga olingan video tarqalib, ijtimoiy tarmoqlarda muhokamalarga sabab boʻlgan edi. Soʻng fuqarolarga qilgan ishi uchun Maʼmuriy javobgarlik toʻgʻrisidagi kodeksning 111-moddasiga asosan BHM (Bazaviy hisoblash miqdori)ning 3 barobari — 1 million 20 ming soʻm miqdorida jarima belgilangan.