Isroil yana Gʻazoga hujum qildi

Gʻazo sogʻliqni saqlash rasmiylarining maʼlum qilishicha, Isroilning Gʻaza shahriga uyushtirgan hujumlari oqibatida tungi zarbalarda kamida 34 kishi halok boʻlgan. Isroil ocharchilik girdobida qolgan shaharga hujumini davom ettirmoqda, shu bilan birga bir qator davlatlar Falastin davlatini tan olishga hozirlanmoqda.

Jasadlarning aksariyati olib kelingan shifoxona mutasaddilarining aytishicha, halok boʻlganlar orasida shanba kuni kechqurun shaharning janubiy qismidagi turar joyga qilingan zarbada oʻlgan 14 kishi ham bor. Sogʻliqni saqlash xodimlari oʻsha zarbada shifoxona hamshirasi, uning rafiqasi va uch farzandi ham halok boʻlganini bildirdi.

Isroil esa bu hujumlar yuzasidan izoh bermadi.

Ushbu haftada boshlangan Isroilning navbatdagi harbiy amaliyoti mintaqada keskinlikni yanada kuchaytirdi va oʻt ochishni toʻxtatish borasidagi har qanday imkoniyatni uzoqlashtirdi. Falastinliklarga shahardan chiqishni buyurgan Isroil armiyasi operatsiyaning aniq muddatini aytmagan, biroq bu oylar davom etishi mumkinligi aytilmoqda. Isroil bu amaliyotni HAMASni garovdagilarni ozod qilish va taslim boʻlishga majburlash uchun qilinayotganini taʼkidlamoqda.

Shanba kechasi amalga oshirilgan zarbalar BMT Bosh Assambleyasida bir qator Gʻarb mamlakatlarining Falastin davlatini tan olish rejalari arafasida yuz berdi. Ular orasida Buyuk Britaniya, Fransiya, Kanada, Avstraliya, Malta, Belgiya va Lyuksemburg bor. Portugaliya Tashqi ishlar vazirligi esa yakshanba kuni Falastin davlatini tan olishini bildirdi.

BMT yigʻilishi arafasida Isroildagi tinchlik faollari Falastin davlatini tan olish tashabbusini olqishladi. Yakshanba kuni yahudiy va arab tashkilotlaridan iborat 60 dan ortiq guruh — qariyb 1000 nafar faollarni birlashtirgan “It’s Time Coalition” (Vaqti keldi koalitsiyasi) — urushni toʻxtatish, garovdagilarni ozod qilish va Falastin davlatini tan olishga chaqirdi.

“Biz abadiy qilich soyasida yashashni rad etamiz. BMT qarori oʻlim tuzogʻidan hayotga, tuganmas diniy urushdan ikkala xalq uchun ham xavfsizlik va ozodlik kelajagiga oʻtish uchun tarixiy imkoniyatni taqdim etmoqda”, — deyiladi koalitsiyaning videomurojaatida.

Shanba oqshomi Isroilda oʻn minglab odamlar urushga barham berish va garovdagilar boʻyicha kelishuvni talab qilib norozilik namoyishiga chiqdi.

Shunga qaramay, sulh hanuz qoʻl yetmas boʻlib qolmoqda. Oʻtgan 23 oy davomida Isroilning bombardimonlari Gʻazada 65 mingdan ortiq kishini halok qildi, butun hududning katta qismini vayronaga aylantirdi, aholining qariyb 90 foizini koʻchirishga majbur qildi va ogʻir gumanitar inqirozni yuzaga keltirdi. Mutaxassislar Gʻaza shahrida ocharchilik hukmronligini taʼkidlamoqda.

Yakshanba kuni Isroil armiyasi bergan bayonotida Gʻaza shahrida hujum uyushtirishga hozirlik koʻrayotgan HAMAS harbiy qanoti merganlaridan biri — Majid Abu Salmiya oʻldirilganini bildirdi. Biroq bunga dalil keltirmadi.