Nasos stansiyalarini yangilash boʻyicha Namangan tajribasi ommalashtiriladi

Katta Namangan magistral kanalida joylashgan ushbu nasos orqali 815 gektar yer sugʻoriladi. Lekin agregatlar eskirib ketgani sababli samaradorlik past, isrofgarchilik koʻp edi. Jumladan, har yili taxminan 6 million kilovatt-soat elektr energiyasi sarflanardi.

Tadbirkor tomonidan davlat-xususiy sheriklik asosida bu yerga energiya tejamkor agregat va zamonaviy uskunalar oʻrnatildi. Yangilangan tizim yiliga qirq foizgacha elektr energiyasini iqtisod qilish imkonini bermoqda.

Tejamkorlik bilan birga yangi nasoslarning suv chiqarish quvvati ham yuqori. Bu esa dalalarni sugʻorish koʻlamini oshirib, hosildorlikni yaxshilashga xizmat qiladi.

Viloyatda ikki yuzdan ortiq nasos stansiyasi bor. Ulardan 43 tasi “Nammotors suv taʼminot” korxonasiga davlat-xususiy sheriklik asosida 10 yil muddatga boshqaruvga berilgan. Bu jarayonga 40 milliard soʻmlik investitsiya yoʻnaltirilgan. Inshootlarga oʻrnatilayotgan nasos agregatlari mahalliylashtirilgan.

Davlat rahbari ikki yil ichida “Ayqiron-1” tajribasi asosida viloyatdagi barcha nasos stansiyalarini modernizatsiya qilish, buni mamlakatning boshqa hududlarida ham bosqichma-bosqich amalga oshirish boʻyicha topshiriq berdi.

Faqat texnologiyalarni yangilash bilan cheklanib qolmasdan, ularni malakali boshqarish va toʻgʻri foydalanish ham muhimligi taʼkidlandi. Ilm va bilim bilan ish yuritilsa, modernizatsiyaning iqtisodiy samarasi yuksaladi. Qishloq xoʻjaligida hosildorlik ortib, oziq-ovqat xavfsizligi va aholi turmush darajasi yaxshilanadi.

Mutasaddilar kelgusida 750 dan ziyod fermer xoʻjaliklariga quyosh panellari orqali ishlaydigan kichik nasoslar hamda tomchilatib sugʻorish tizimlarining joriy etilishi haqida maʼlumot berdi.