Neft-gaz tarmogʻida raqamli yechimlar va sunʼiy intellekt keng joriy etilmoqda

Neft-gaz tarmogʻi kabi murakkab va xavfli sohalarda ishlab chiqarish samaradorligini oshirish, xavfsizlikni taʼminlash hamda jarayonlarni optimallashtirishda sunʼiy intellekt texnologiyalari muhim ahamiyat kasb etadi.

“Oʻzbekneftgaz” AJ axborot xizmati rahbari Moʻmin Ibodov mazkur tashkilotda global raqamlashuv tendensiyalariga uygʻun ravishda faoliyat olib borilayotganini taʼkidladi. 

– Konlarda olib borilayotgan izlov-qidiruv ishlarida geologik, geofizik va gidrodinamik maʼlumotlarni tahlil qilish uchun zamonaviy yechimlar joriy etilmoqda, – dedi M.Ibodov. – Masalan, “Pipesim” qatlam tizimlari modellari, “ProSource” maʼlumotlar bazasi va E-KON platformasi bilan integratsiya qilingan “Generative AI chat-bot” ishlab chiqildi. 

Bu tizim mutaxassislarga tezkor va aniq tahliliy xulosalar tayyorlash imkoniyatini yaratadi. Xodimlarning kundalik ishini yengillashtirish va samaradorligini oshirish maqsadida “Microsoft 365” dasturiy taʼminoti uchun litsenziyalar xarid qilingan. Buning natijasida ular maʼlumotni qayta ishlash, vazifalarni bajarish va “Microsoft Copilot” xizmatlaridan foydalanish imkoniyatiga ega boʻldi. 

Jamoaviy ish jarayonlarini yanada samarali tashkil etish boʻyicha avval “ChatGPT Team”, keyinchalik esa “ChatGPT Enterprise” platformasini joriy etish rejalashtirilgan. Ayni paytda biz neft va gazni qazib chiqarish va qayta ishlash jarayonlarini boshqarishda “Primavera P6 EPPM” tizimiga toʻliq oʻtyapmiz. Bu tizim asosida loyihalar ustidan yagona nazorat oʻrnatish, xarajatlarni aniq hisobga olish hamda CIC + AI Analytics + Primavera kabi imkoniyatlar bilan xatarlarni oldindan boshqarish mumkin. Shu bilan birga, qurilish maydonlaridagi maʼlumotlar real vaqt rejimida tahlil qilinib, ishlar borishi avtomatik baholanadi. Bu kechikishlarni kamaytirib, boshqaruv qarorlarini sunʼiy intellekt asosida qabul qilish jarayonini takomillashtiradi.

Shuningdek, ishlab chiqarish obʼektlarining raqamli egizaklarini yaratish va sunʼiy intellekt tahlili asosida jarayonlarni optimallashtirish masalalari ham oʻrganilmoqda. Bu xavf-xatarlarni oldindan aniqlash va ish unumdorligini oshirishda muhim. 

Ahamiyatlisi, biz xodimlarimizning raqamli texnologiyalar va sunʼiy intellekt yechimlaridan samarali foydalanishi uchun oʻquv kurslari tashkil etyapmiz. Bu ularning malakasini zamon talablariga mos ravishda rivojlantirishga imkon beradi.