Olimpiada kundaligi: Oʻzbekiston Olimpiada tarixida shaxsiy rekordini yangiladi

Boks boʻyicha Oʻzbekiston terma jamoasi aʼzosi Asadxoʻja Moʻydinxoʻjayev -71 kg vazn toifasida Olimpiya oʻyinlari chempionligini qoʻlga kiritdi. U murosasiz ruhda oʻtgan final jangda meksikalik Marko Alvaresni magʻlubiyatga uchratishga muvaffaq boʻldi.

Bundan tashqari, Fargʻona boksining yana bir yorqin vakili Lazizbek Mullojonov ham Oʻzbekiston delegatsiyasiga navbatdagi oltin medalni taqdim qildi. -92 kg vazn toifasida ishtirok etgan Mullojonov  chempionlik bahsida ozarbayjonlik Loren Alfonso Domingesni magʻlub etib, oltin medalga sazovor boʻldi.

Oʻzbekiston delegatsiyasi hisobiga navbatdagi medalni erkin kurashchi  Gʻulomjon Abdullayev olib keldi. -57 kg vazn toifasida ishtirok etgan Abdullayev bronza medali uchun bahsda qirgʻizistonlik Bekzat Almaz oʻgʻlidan ustun keldi va uchinchi oʻrinni egalladi.

Taekvondochi Ozoda Sobirjonova Parij-2024 yozgi Olimpiya oʻyinlarining bronza medali uchun dayanga chiqdi. -67 kg vazn toifasida ishtirok etgan Sobirjonova belgiyalik Sara Chariga imkoniyatni boy berdi va shu nuqtada ishtirokini yakunladi.

Shuningdek, taekvondochi Jasur Jaysunov ham bronza medali uchun oʻtish bosqichidagi jangini yakunladi. -80 kg vazn toifasida ishtirok etayotgan Jaysunovga italiyalik ikki karra jahon chempioni Simone Alessio raqiblik qildi. Shiddatli jangda yevropalik sportchining qoʻli baland keldi va Jaysunov Olimpiadadagi ishtirokini shu nuqtada tugatdi.  

Yana bir Oʻzbekiston nomidan maydonga tushgan erkin kurashchi Javrail Shapiyev -86 kg vazn toifasining bronza medali uchun kurash olib bordi. Amerikalik nomdor Aron Bruks bilan bellashgan Shapiyev murosasiz bahsda imkoniyatni boy berdi va Olimpiya oʻyinlarini kuchli beshlikda tugatdi.

Oʻzbekistonlik sportchilar Olimpiya oʻyinlarida suvga sakrash dasturida debyut qildi. 10 metrli platformadan sakrash boʻyicha ishtirok etgan Igor Myalin saralashda 357,10 ball jamgʻardi va 21-natijani qayd etdi. Afsuski, bu ball sportchiga yarim final yoʻllanmasi uchun kamlik qildi. 

Uzoq yillik tanaffusdan keyin oʻzbekistonlik erkin kurashchi yana Olimpiya oʻyinlarida finaliga chiqdi. -74 kg vazn toifasida ishtirok etayotgan Oʻzbekiston terma jamoasi aʼzosi Razambek Jamalov yarim finalda tojikistonlik Viktor Rassadinni magʻlubiyatga uchratib, final yoʻllanmasiga ega chiqdi. Oltin medal uchun bahsda Jamalovga yaponiyalik Daichi Takatani raqiblik qiladi. 

Kecha badiiy gimnastika boʻyicha guruh mashqi yoʻnalishining saralash bosqichi ham boʻlib oʻtdi. Unda ishtirok etgan Oʻzbekiston terma jamoasi aʼzolari Mumtoza Isʼhoqzoda, Shahzoda Ibragimova, Iroda Sodiqova, Evelina Atalyans hamda Amaliya Mamedova 64,000 ball bilan 7-oʻrinni egallashdi. Bu orqali ular bugun boʻlib oʻtadigan final bosqichida ishtirok etish imkoniyatiga ega boʻldi. 

Parij-2024 yozgi Olimpiya oʻyinlari yakuniga yetmagan boʻlsada, Oʻzbekiston delegatsiyasi ayni paytning oʻzidayoq 5 ta oltin va 3 ta bronza medallari bilan oʻz tarixidagi eng yaxshi natijani yangilab ulgurdi. Hali oldinda 3 nafar atletikachining final bahslari, qolaversa, ishtirokini kutib turgan bir qator sportchilar bor.