Олимпиада кундалиги: Ўзбекистон Олимпиада тарихида шахсий рекордини янгилади

Бокс бўйича Ўзбекистон терма жамоаси аъзоси Асадхўжа Мўйдинхўжаев -71 кг вазн тоифасида Олимпия ўйинлари чемпионлигини қўлга киритди. У муросасиз руҳда ўтган финал жангда мексикалик Марко Альваресни мағлубиятга учратишга муваффақ бўлди.

Бундан ташқари, Фарғона боксининг яна бир ёрқин вакили Лазизбек Мулложонов ҳам Ўзбекистон делегациясига навбатдаги олтин медални тақдим қилди. -92 кг вазн тоифасида иштирок этган Мулложонов  чемпионлик баҳсида озарбайжонлик Лорен Альфонсо Домингесни мағлуб этиб, олтин медалга сазовор бўлди.

Ўзбекистон делегацияси ҳисобига навбатдаги медални эркин курашчи  Ғуломжон Абдуллаев олиб келди. -57 кг вазн тоифасида иштирок этган Абдуллаев бронза медали учун баҳсда қирғизистонлик Бекзат Алмаз ўғлидан устун келди ва учинчи ўринни эгаллади.

Таэквондочи Озода Собиржонова Париж-2024 ёзги Олимпия ўйинларининг бронза медали учун даянга чиқди. -67 кг вазн тоифасида иштирок этган Собиржонова белгиялик Сара Чарига имкониятни бой берди ва шу нуқтада иштирокини якунлади.

Шунингдек, таэквондочи Жасур Жайсунов ҳам бронза медали учун ўтиш босқичидаги жангини якунлади. -80 кг вазн тоифасида иштирок этаётган Жайсуновга италиялик икки карра жаҳон чемпиони Симоне Алессио рақиблик қилди. Шиддатли жангда европалик спортчининг қўли баланд келди ва Жайсунов Олимпиададаги иштирокини шу нуқтада тугатди.  

Яна бир Ўзбекистон номидан майдонга тушган эркин курашчи Жавраил Шапиев -86 кг вазн тоифасининг бронза медали учун кураш олиб борди. Америкалик номдор Арон Брукс билан беллашган Шапиев муросасиз баҳсда имкониятни бой берди ва Олимпия ўйинларини кучли бешликда тугатди.

Ўзбекистонлик спортчилар Олимпия ўйинларида сувга сакраш дастурида дебют қилди. 10 метрли платформадан сакраш бўйича иштирок этган Игор Мялин саралашда 357,10 балл жамғарди ва 21-натижани қайд этди. Афсуски, бу балл спортчига ярим финал йўлланмаси учун камлик қилди. 

Узоқ йиллик танаффусдан кейин ўзбекистонлик эркин курашчи яна Олимпия ўйинларида финалига чиқди. -74 кг вазн тоифасида иштирок этаётган Ўзбекистон терма жамоаси аъзоси Разамбек Жамалов ярим финалда тожикистонлик Виктор Рассадинни мағлубиятга учратиб, финал йўлланмасига эга чиқди. Олтин медаль учун баҳсда Жамаловга япониялик Даичи Такатани рақиблик қилади. 

Кеча бадиий гимнастика бўйича гуруҳ машқи йўналишининг саралаш босқичи ҳам бўлиб ўтди. Унда иштирок этган Ўзбекистон терма жамоаси аъзолари Мумтоза Исъҳоқзода, Шаҳзода Ибрагимова, Ирода Содиқова, Эвелина Атальянс ҳамда Амалия Мамедова 64,000 балл билан 7-ўринни эгаллашди. Бу орқали улар бугун бўлиб ўтадиган финал босқичида иштирок этиш имкониятига эга бўлди. 

Париж-2024 ёзги Олимпия ўйинлари якунига етмаган бўлсада, Ўзбекистон делегацияси айни пайтнинг ўзидаёқ 5 та олтин ва 3 та бронза медаллари билан ўз тарихидаги энг яхши натижани янгилаб улгурди. Ҳали олдинда 3 нафар атлетикачининг финал баҳслари, қолаверса, иштирокини кутиб турган бир қатор спортчилар бор.