Endi avtomobillar «qizil», «sariq», «yashil» stikerlar orqali ekologik toifalarga ajratiladi

Xabarda aytilishicha, Toshkent shahri Mirobod tumani «Fayziobod» mahallasida joylashgan Yoʻl harakati xavfsizligi boshqarmasining roʻyxatdan oʻtkazish va imtihon olish boʻlimi zamonaviy diagnostika markaziga aylantirildi.

Markazda davlat raqam belgisi va texpasport berish jarayoni ancha soddalashtirilgan. Ilgar bu jarayonlar uchun 2-3 soat ketgan boʻlsa, hozirda bu ishlar uchun taxminan 15 daqiqa yetadi.

Markazda nafaqat mashinalarga davlat raqami va «texpasport» beriladi, balki endilikda avtomobildan ekologiyaga chiqayotgan zararli moddalar miqdori ham tekshiriladi.

Ekologik tekshiruv natijasidan kelib chiqib «qizil» (juda yomon), «sariq» (oʻrtacha) yoki «yashil» (ekologik toza) yorliq (stiker) mashinaning old oynasiga yopishtiriladi.

Aytilishicha, hozirgi ekologik vaziyatdan kelib chiqib, Toshkent shahar hududi bir nechta ekologik zonalarga ajratilishi kutilmoqda. Yaʼni transport vositalarining havoga chiqarayotgan zararli moddalari darajasiga koʻra (stiker rangiga qarab) ayrim ekologik zonalarga kirishi cheklanadi.

Agar bu zonalarga qizil yoki sariq stikerli mashinalar kirsa nima boʻladi?

Tartibga amal qilish avtomatlashtirilgan kameralar orqali nazorat qilinadi va qoidani buzganlarga jarima yoziladi. Tushgan jarimalar esa oʻsha hududning ekologik holatini yaxshilashga sarflanadi.

Markaz faoliyatini tashkil etishda Germaniya, Belgiya, Fransiya kabi rivojlangan mamlakatlar shaharlarining ekologik muhitini muhofaza qilish sohasidagi ilgʻor tajriba inobatga olingan.

Kelgusida respublika boʻylab 84 ta roʻyxatga olish-diagnostika markazlarini hamda YHXXning 216 ta hududiy tuman boʻlinmalarini mashinalarni ekologik diagnostika qiladigan zamonaviy uskunalar bilan jihozlash rejalashtirilmoqda, deyiladi xabarda.