Festivallar oʻtkazish bitta koʻchani asfalt qilgandan koʻra muhimroq – Ozodbek Nazarbekov

 Davlat byudjetidan milliardlab mablagʻ sarflab festival va tadbirbozliklar qilish har doim muhokamali mavzu boʻlgan. Madaniyat vazirligi yoki Turizm qoʻmitasi ushbu festivallarga qancha mablagʻ sarflayotganini doim ham ochiqlamaydi.
Madaniyat vazirligi tomonidan yosh isteʼdodlarni aniqlashni maqsad qilgan “Ovoz” loyihasining hali muhokamalari yakunlanmay turib, vazirning ayni kunlarda Samarqand shahrida oʻtkazilayotgan “Sharq taronalari” festivalidagi nutqi yana muhokamalar markaziga tushdi. Madaniyat vaziri tadbirda bu kabi festivallarni oʻtkazishdan asosiy maqsad nimaligi haqida aytib, intervyusi davomida festivallar oʻtkazish bitta koʻchani asfalt qilgandan koʻra muhimroq ekanini taʼkidlagan. 
“Sizlar koʻp savol berasizlar bizga: maqom festivali qilyapsizlar, baxshichilik, hunarmandlar festivallari qilyapsizlar, bular kerakmi, undan koʻra asfalt qilgan yaxshimasmi, degan millionta har xil fikrlar bor. Lekin hozir bu, kechirasiz-u, bitta koʻchani asfalt qilgandan koʻra muhimroq. 
Chunki inson madaniyatiga tahdid bostirib kelyapti, shuning uchun bunaqa festivallarga 3−5 mlrd soʻm ishlatish, menimcha, inson kelajagini asrab qolishda juda muhim. Madaniyat vaziri sifatida bunga asfaltdan ham muhimroq, boshqa narsalardan ham oʻta muhim boʻlgan masala, deb qarayman”, degan Ozodbek Nazarbekov.

Madaniyat vaziri asfalsiz koʻchada yashashni yoki shunday changga botgan dalada festival qilishni bir oʻylab koʻrganmikan? Davlat byudjeti xalq toʻlaydigan soliqlardan shakllantirilishini, aslida u ham xalqning puli ekanliginichi? 
Bundan tashqari, bunday festivallar koʻp hollarda xalqning doimiy qulay sharoitini noqulaylashtiradi. Masalan, Samarqandda oʻtkazilinayotgan festival uchun koʻplab yoʻllar yopilgan. Oʻtgan yili Buxoroda oʻtkazilgan Ziravorlar festivali boʻladigan joy oldindan repetitsiya uchun yopilib chet el va mahalliy sayyohlar kiritilmagani aytilgan edi. 
Xalqning 3-5 mlrd mablagʻi avvalo ularning qulay sharoiti uchun emasmi? Yoki ularga faqat koʻrmoq bor, yemoq yoʻqmi? Ayni kunlarda poytaxtning gavjum metro bekatlari oldida qadam bosishga joy qolmagan, odamlar oilasidan uzoqda kimningdir nomiga kredit olib, qarz qilib mahallasidagi yoʻl, maktabni taʼmirlashga mablagʻ ajratish uchun pul sarflab ovoz yigʻib yuribdi. Hurmatli vazir ularga festivalning qizigʻi yoʻq!

Maʼlumot uchun, Ozodbek Nazarbekov bundan oldin Aokada vazirlikning faoliyatiga bagʻishlangan matbuot anjumanida jurnalistlarning “Ovoz” loyihasi uchun sarflangan mablagʻlari muhokamalarga sabab boʻlgani, oʻzi shunday loyiha kerakmi mazmunidagi savoliga “Loyihaga ketgan mablagʻlarni muhokama qilaversangiz uyimni sotib boʻlsa ham toʻlab beraman” degan edi.

Savol: Vazirning uyi shuncha qimmat turadimi?

Bundan tashqari jurnalistlarni qoʻshtirnoq ichida yaxshigina kimgadur xizmat qilishda ayblagan vazir kiyim doʻkonini reklama qilib yurganda va qargʻa qargʻaning koʻzini choʻqimaydi deganlaridek Raqobat qoʻmitasi kiyim doʻkonga jarima qoʻllab, madaniyat vazirini beayb ekanligini aytgan.

Madaniyat vaziri yana bir matbuot anjumanida madaniyat sohasiga koʻp mablagʻ ajratilmasligini aytgan edi. Vazir festivallardan va amaldorlar tushurib yuradigan “Yil qovuni” nominatsiyasi uchun kurashdan boʻshaganda viloyatlardagi madaniyat markazlari holati va xodimlar saviyasi bilan ham shugʻullanar deb umid qilamiz.