“Insofsiz tekshiruvchilar reyestri” – tadbirkorlar uchun yangi himoya tizimi

2026-yil 1-iyuldan “Yagona davlat nazorati” axborot tizimi va uning mobil ilovasi ishga tushiriladi.

Xususan, tadbirkor o‘zi faoliyat yuritayotgan hududdagi mas’ul mansabdor shaxslar – tuman (shahar) hokimi, mahalla raisi, hokim yordamchisi, profilaktika va soliq inspektorlari haqida to‘liq ma’lumot olish hamda ular bilan bevosita muloqot qilish imkoniyatiga ega bo‘ladi.

Endilikda davlat xizmatchisining tadbirkor faoliyat yuritayotgan obyektga nazorat yoki profilaktika tadbirisiz borishi yoki tadbirkorni boshqa joyga chaqirishi “nazorat tadbiri hisoblanmaydigan muloqot” sifatida rasmiy qayd etiladi.

Xususan, “norasmiy homiylik”, asossiz iltimoslar yoki boshqa qonunchilikka zid xatti-harakatlar uchun zamin yaratadigan yashirin muloqotlar endilikda tizimli ravishda nazorat ostiga olinadi.

Bunday muloqotlar haqidagi ma’lumotlarni “Yagona davlat nazorati” axborot tizimiga kiritish davlat xizmatchilari uchun majburiy. 

Endi har qanday uchrashuv hujjatlashtiriladi va bu talabga amal qilinmasa, mansabdor shaxsga nisbatan xizmat tekshiruvi o‘tkazilishi mumkin.

Bundan tashqari, bir yil davomida bir tadbirkor bilan ikki va undan ortiq marotaba asossiz muloqotga kirishgan davlat xizmatchilariga nisbatan qat’iy choralar belgilandi. 

Bunday holatda ularga xizmat tekshiruvi o‘tkazilishi, aynan shu tadbirkor faoliyatini tekshirishda 12 oy davomida cheklov qo‘yilishi yoki tadbirkorlik subyektlari faoliyatida tekshirish o‘tkazishga vakolat beruvchi maxsus guvohnomaning vaqtincha to‘xtatilishi mumkin.

Qoidalarni muntazam buzgan mansabdor shaxslarning “Insofsiz tekshiruvchilar reyestri”ga kiritiladi.

“Biznes himoya” QR-kodi joriy etiladi

“Biznes himoya” tizimi orqali tadbirkor zimmasidagi ortiqcha byurokratik yuklama – tekshiruvlarni ro‘yxatga olish elektron kitobini taqdim etish majburiyati bekor qilinmoqda. 

Endilikda nazorat qiluvchi organ vakili tekshiruv boshlashdan oldin tadbirkordagi QR-kodni skaner qilish orqali barcha jarayonni “Yagona davlat nazorati” tizimida avtomatik ro‘yxatdan o‘tkazadi. 

Agar davlat xizmatchisi QR-kod orqali tekshiruv yoki muloqotni tizimga kiritmasa, tadbirkor uni o‘z hududiga kiritmaslik yoki muloqotga kirishmaslik huquqiga ega. 

Shuningdek, 2026-yil 1-iyuldan tadbirkorlarni davlat ro‘yxatidan o‘tkazish jarayonida ular uchun “Yagona davlat nazorati” axborot tizimida shaxsiy kabinet avtomatik ravishda ochilishi belgilangan. 

Bu faoliyatini endi boshlayotgan tadbirkorlarga alohida murojaat yoki qo‘shimcha harakatlarsiz nazorat jarayonlarini boshqarish, tekshiruvlar tarixini kuzatish va o‘z huquqlarini himoya qilish imkonini beradi.