Islohot – vazirlik nomini oʻzgartirish, xolosmi?

1988 yilda tashkil topgan Oʻzbekiston Tabiatni muhofaza qilish davlat qoʻmitasi 2017 yilda Ekologiya va atrof-muhitni muhofaza qilish davlat qoʻmitasi deya qayta tashkil etildi. 

Oradan ikki yil oʻtib, 2019 yil 30 yanvarda qoʻmita tugatilib, uning asosida «Ekologiya va atrof-muhitni muhofaza qilish vazirligi» tashkil etildi.

Biroq vazirlik ham uzoq yashamadi, 2025 yil 19 noyabr kuni vazirlik qaytadan qoʻmitaga aylantirilib, «Ekologiya va iqlim oʻzgarishi milliy qoʻmitasi» nomini oldi. 

Shu oʻrinda yuqoridagilar islohot deganda faqat vazirlik yoki tashkilot nomini oʻzgartirib, vazirni qoʻmita raisi, raisni maslahatchi, Alini Vali deb atash, uning doʻppisini bunga, buning telpagini unga kiydirishni tushunishadimi?

7 yilda nomi 3 marta oʻzgargan tashkilot amalda nima qila olishiga guvoh boʻlib kelyapmiz. Hamma joy changga bulanganini, mayli, global iqlim oʻzgarishi bilan xaspoʻshlaylik, lekin nega moratoriyga qaramasdan daraxtkushlik, daryo oʻzanlarining ochofatlarcha talon-toroj qilinayotgani, tartibsiz va nazoratsiz qurilishlar, suv hafzalarining ifloslanishi hamon davom etmoqda?

Yana bir savol: tashkilot nomi har oʻzgarishi soliq toʻlovchilar gardaniga qancha yuk boʻlib tushyapti? Peshlavha, yozuv tablichkalari, logotip, muhr va shtamplardan tortib, mehnat va boshqa shartnomalargacha – bular qancha turadi va kimning hisobidan yangilanadi? Yana har ikki-uch yilda bir nom yangilanishi — bu yogʻi endi juda oshib ketmadimi? Shuncha xarajat va harakatga yarasha nimadir oʻzgarsa ham mayli edi!

Janoblar! Oʻzingizni ishlayotgandek koʻrsatishni bas qilib, amaliy choralar koʻrishga oʻtarsizlar balki? Axir vaqt oʻtyapti, oʻzgarishlar kutilgandan koʻra jadallashdi, harakatsizligingiz oqibati hamma joyda koʻrinishni, saratondek “metastaza” berishni boshladi-ku! Bir-birlaringga “nima qilamiz-nima qilamiz”, degan paytda vazirlik va tashkilotlar nomini oʻzgartirib nom topayotganlarga emas, sohaning haqiqiy egalariga, jonkuyarlariga, olim va mutaxassislariga ham quloq tutinglar! Iltimos, nomning oʻzi juda zoʻr, tushunarli va hamma narsani ifoda etib turibdi. Ishni qilinglar! Ishni!

Sanjar Said