«Mubashshir Ahmad jazoni oʻtay olmaydi» — advokat salomatlik holati ogʻirligini bildirdi

 Biroq uning salomatligi ogʻir ekani, jazoni oʻtashga toʻsqinlik qilayotgani aytilmoqda.

Advokat Abdulloh Sodiqning Kun.uz’ga maʼlum qilishicha, Alisher Tursunovga «Qandli diabet II tip, insulinga muhtoj turi», shuningdek, artroz, stenokardiya, yuqori qon bosimi va buyrak faoliyati bilan bogʻliq muammolar tashxislari qoʻyilgan. Ulamoning oyoqlari shishib ketgan, tanasida yaralar paydo boʻlayotgan boʻlsa-da, toʻliq davolanishiga ruxsat berilmayapti.

Advokatning aytishicha, 2025 yil noyabr oyida Tursunov rasman 3 marta ambulator davolangani koʻrsatilgan. Ammo 26 dekabr kuni boʻlib oʻtgan uchrashuvda mahbus bu muolajalar amalda berilmaganini, u faqat tibbiy koʻrikdan oʻtkazilganini bildirgan. Shuningdek, dori-darmon bilan taʼminlanmagani va yotib davolanishiga ruxsat yoʻqligini aytgan.

Shunga qaramay, uni 16 soatlab ogʻir jismoniy mehnatga, xususan gʻisht zavodida ishlashga majburlashayotgani maʼlum qilindi. Advokat bu holat Tursunovning hayoti va sogʻligi uchun jiddiy xavf tugʻdirishini taʼkidlamoqda.

Advokatning taʼkidlashicha, Oʻzbekiston Respublikasi Jinoyat kodeksining 75-moddasiga koʻra, jazoni oʻtashga toʻsqinlik qiladigan ogʻir kasallikka chalingan shaxs jazodan ozod qilinishi mumkin. «Qandli diabet II tip» ushbu modda asosida ozod qilishga sabab boʻladigan kasalliklar roʻyxatiga kiritilgan.

Shu munosabat bilan advokat tomonidan IIV, Bosh prokuratura va boshqa mutasaddi idoralarga arizalar kiritilgan.