Pedofillar umrbod ozodlikdan mahrum qilinadi — Prezident farmoni

Jinoyat kodeksiga kiritilgan oʻzgartishlarga koʻra, voyaga yetmaganlarga nisbatan jinsiy erkinlikka qarshi jinoyatlar, shuningdek ular bilan jinsiy aloqa qilish va uyatsiz-buzuq harakatlar sodir etgani uchun muqaddam sudlangan shaxslar quyidagi jinoyatlarni qayta sodir etgan taqdirda ularga umrbod yoki uzoq muddatli ozodlikdan mahrum qilish jazosi tayinlanadi:

— oʻn toʻrt yoshga toʻlmagan shaxsning nomusiga tegish;
— oʻn toʻrt yoshga toʻlmagan shaxsga nisbatan jinsiy ehtiyojni zoʻrlik ishlatib gʻayritabiiy usulda qondirish;
— oʻn olti yoshga toʻlmagan shaxsga nisbatan uyatsiz-buzuq harakatlarni bir guruh shaxslar tomonidan sodir etish.

Shuningdek, tergov va sud amaliyotidan kelib chiqqan holda Jinoyat kodeksining 129-moddasi dispozitsiyasiga aniqlik kiritildi.

Mazkur norma voyaga yetmaganlarni himoya qilishga qaratilgan qatʼiy huquqiy chora hisoblanadi. Avval ham sudlangan shaxslarga nisbatan umrbod yoki uzoq muddatli jazoning joriy etilishi jazoning muqarrarligini taʼminlashga hamda bunday jinoyatlarning oldini olishga xizmat qiladi.