Qoraqalpog‘istonda 672 ta yo‘rg‘a tuvaloq tabiatga qo‘yib yuborildi

26-iyun kuni Qoraqalpog‘iston Respublikasi hududida 672 ta yo‘rg‘a tuvaloq tabiatga qo‘yib yuborildi.

Qushlar Qozog‘istondagi ixtisoslashtirilgan ko‘paytirish markazida parvarish qilindi. Zarur tayyorgarlikdan o‘tkazilgach, Orolbo‘yiga olib kelinib, yovvoyi tabiat qo‘yniga qo‘yib yuborildi.

Tadbir Ekologiya va iqlim o‘zgarishi milliy qo‘mitasining hududiy bo‘linmalari mutaxassislari, xalqaro ekspertlar, CITES ma’muriy organi vakillari hamda “Falcon Hunting Solutions” MChJ xodimlari nazorati ostida o‘tkazildi.

Yo‘rg‘a tuvaloqni asrash nega muhim?

Yo‘rg‘a tuvaloq populyatsiyasini tiklash Orol dengizi mintaqasi uchun alohida ahamiyatga ega.

Orol dengizining qurishi oqibatida yuzaga kelgan ekologik inqiroz Qoraqalpog‘istonning tabiiy ekotizimlarida jiddiy o‘zgarishlarga sabab bo‘ldi.

Natijada cho‘l va dasht hududlariga xos ko‘plab hayvon hamda qushlarning tabiiy yashash maydonlari qisqarib, ularning soni sezilarli darajada kamaydi.

Yo‘rg‘a tuvaloq alohida muhofazaga muhtoj bo‘lgan noyob turlar sirasiga kiradi. Uni tabiiy yashash muhitiga qaytarish tabiatdagi ekologik muvozanatni tiklash va Orolbo‘yi bioxilma-xilligini saqlashga xizmat qiladi.

Yo‘rg‘a tuvaloq populyatsiyasini tiklash va uning yashash muhitini muhofaza qilish bo‘yicha ishlar Orolbo‘yida bioxilma-xillikni saqlashga qaratilgan uzoq muddatli dasturlar doirasida izchil davom ettiriladi, deyilgan rasmiy xabarda.