Toshkentda “aqlli” svetoforlar tizimi kengaytiriladi

Toshkent shahar hokimligi maʼlumotiga koʻra, poytaxtda yoʻl harakatini boshqarish tizimi modernizatsiya qilinmoqda. Hozirgi vaqtda 125 ta chorraha tizimga ulangan, 2026 yilga qadar yana 545 ta obʼekt ulanishi rejalashtirilgan.

Singapur, Kopengagen va Nyu-York kabi shaharlarda joriy etilgan sunʼiy intellektli svetoforlar kamera va sensorlar orqali transport va piyodalar harakatini real vaqtda tahlil qiladi. Mashinalar oqimi va tirbandlik darajasiga qarab signallar vaqti avtomatik oʻzgaradi, bu safar vaqtini oʻrtacha 20% qisqartiradi.

Tez yordam va favqulodda holatlarda tizim avtomatik ustuvorlik beradi: “yashil yoʻlak” yaratib, maxsus transport toʻxtamasdan harakat qiladi, bu esa inson hayotini saqlashda hal qiluvchi ahamiyatga ega.

Hisob-kitoblar asosida tizim yoʻl polosalari boʻyicha transport oqimini tahlil qiladi. Toshkentda 5 daqiqa ichida asosiy harakat polosasidan 300 ta, burilish polosasidan 120 ta avtomobil oʻtsa, sunʼiy intellekt bu maʼlumotga qarab signal vaqtlarini taqsimlaydi.

Oʻzbekiston infratuzilmasida tizim joriy etish oson: videokameralar, sensorlar va optik internet tarmoqlari mavjud. Bu yechim iqtisodiy va samarali boʻlib, yoʻl infratuzilmasini toʻliq qayta qurish talab etilmaydi.

Shunga koʻra, Toshkentda 2026 yil yakuniga qadar 545 ta zamonaviy “aqlli” svetofor oʻrnatilishi rejalashtirilgan, bu esa yoʻl harakati tartibini yaxshilash va tirbandliklarni kamaytirishda katta ahamiyatga ega.

Muallif: Guli Ahmadova