Ozodbek Nazarbekov: "Ovoz"da oʻzimning qarindoshimni chiqarishdan menga nima foyda?!

PARADIGMA.UZ jurnalisti ushbu loyiha qay darajada shaffof oʻtganiga aniqlik kiritish maqsadida Madaniyat vaziri Ozodbek Nazarbekovni soʻroqqa tutdi. 

Vazir esa oʻziga qarshi bildirilgan ayblovlarni rad etdi va hech qanday manfaatlar toʻqnashuvi boʻlmaganini, bunday holatning paydo boʻlishi imkonsizligini bildirdi. 

"Ovoz" loyihasida manfaatlar toʻqnashuvi boʻldi, deb koʻpchilik aholi yozdi. Agar oxirida yarim finalni koʻrgan boʻlsangiz, tomoshabin oʻziga yoqqan ishtirokchiga ovoz berdi. Hakamlar tanlov qilmadi. Bu yerda hakamlar bir-biriga raqib. Masalan, menga nima kerak, "Ovoz"ga eng salbiy qarindoshimni olib kelib, uni finalgacha koʻtarib chiqish",  

deydi u. 

Bundan tashqari, Ozodbek Nazarbekov kelgusida "Ovoz" loyihasida ishtirok etmasligini va yangi hakamlar tanlanishini aytdi. 

"Ovoz"ning bu galgi mavsumida boshqa hakamlar ishtirok etadi. Yana aytaman, loyihada korrupsiya qilish imkonsiz. Bu Gollandiya (Niderlandiya) loyihasi. Tashkilotchilar yetti oʻlchab bir kesib. uni tashkillashtirishgan. Faqat bitta masalada korrupsiya boʻlishi mumkin. Bu ham SMSda", 

dedi Madaniyat vaziri. 

Maʼlumot uchun, loyihaning birinchi mavsumida Ozodbek Nazarbekov, Sevara Nazarxon, Tohir Sodiqov va Farrux Zokirov hakam sifatida qatnashgan. Loyihada ishtirok etgan 2 hakamning qarindoshlari, yaʼni vazir Nazarbekovga kuyov boʻlgan Yorqinxoʻja Umurovning singlisi — Madlen Sharipova hamda Sevara Nazarxonning jiyani — Yulduz Nazarxonova yarim finalgacha yetib kelgan.