Париж-2024: Бугун Ўзбекистон ҳисобига яна учта медаль қўшилади

Тошкент вақти билан соат 11:00 дан бошлаб спортнинг 7 тури бўйича 9 нафар атлет ўйинлари старт олади. Дастлаб эркаклар ўртасидаги енгил атлетика баҳсларида Шоҳруҳ Давлатов ўзининг чиқишларни бошлаб беради. 

Сўнгра таэквондо бўйича Олимпиаданинг 1/8 финал босқичида +80 кг вазн тоифасида Никита Рафалович эронлик Ариан Салимийга қарши жанг қилади. Шу спорт турининг чорак финал аёллар баҳсида +67 кг вазн тоифасида Светлана Осипова Кот-д'Ивуар вакили Астан Басилий билан курашади. 

Соат 14:30 ларда оғир атлетика спорти доирасида эркаклар ўртасида 102 кг вазнда Акбар Жўраев иштирокини бошлайди. Шундан сўнг аёллар ўртасида ҳам баҳсларга старт берилади. Унда Ўзбекистон делегатсиясидан Ригина Адашбоева 81 кг вазнда баҳсларга киришади. 

Замонавий бешкураш баҳсларида кейинги босқич йўлланмасини қўлга киритган Алисе Фахрутдинова бугун навбатдаги босқичда иштирокини давом эттиради. 

Эркин кураш беллашувларида 74 кг вазн тоифасида финал йўлланмасини қўлга киритган Разамбек Жамолов эса олтин медаль учун Даичи Такатага қарши гиламга чиқади. Бу баҳс соат 22:35 дан бошланади. 

Кун беллашувларини якунлаб берадиган бокс жангларида Ўзбекистоннинг икки нафар вакили олтин медаль учун курашади. 57 кг вазн тоифасининг финал баҳсида Абдумалик Ҳалаков қирғизистонлик Мунарбек Сейитбек уғлуга қарши рингга чиқади. Бу жанг 00:47 да бошланади. Токио Олимпиадаси чемпиони, бир неча карра жаҳон чемпиони Баҳодир Жалолов (+92 кг) эса финал баҳсини Аюб Ғадфага қарши олиб боради. Бу жанг соат 1:51 дан бошлаб эфирга узатилади. 

Маълумот учун, бокс мусобақаларида Ўзбекистон вакиллари 7 та вазн тоифасида иштирок этмоқда. Уларнинг 5 таси финал йўлланмасини қўлга киритган. Ҳозирча боксчилар ҳисобида 3 та олтин медаль бор.