Pokistonda 5 nafar farzandi bilan mushkul ahvolda qolgan fuqaro Oʻzbekistonga qaytarildi

Oʻzbekiston diplomatik vakolatxonasi maʼlumotiga koʻra, vatandoshimiz K.I. oʻz murojaatida Pokistonda boquvchisiz qolgani, turar joy va kundalik ehtiyojlar, xususan oziq-ovqat uchun ham zarur mablagʻga ega emasligini maʼlum qilib, Oʻzbekistonga qaytishi uchun amaliy yordam berishni soʻragan.

Murojaat elchixona tomonidan alohida nazoratga olinib, tezkor choralar koʻrildi.  Ular vaqtinchalik turar-joy, oziq-ovqat, kiyim-kechak hamda kundalik ehtiyojlari uchun mablagʻ bilan taʼminlandi. Shuningdek, oilaning Oʻzbekistonga yetib olishi uchun Vatanga qaytish guvohnomalari rasmiylashtirildi, boshqa turdagi zarur konsullik-huquqiy yordam koʻrsatildi.

Pokistonning tegishli vazirlik va idoralari mutasaddilari bilan oʻtkazilgan muzokaralar natijasida, ushbu mamlakatdagi viza tartiboti va bu yerda boʻlib turish tartiblari buzilganiga qaramasdan, hamyurtimiz va uning farzandlarini jarima va toʻlovlarsiz davlatdan chiqarib yuborish toʻgʻrisida kelishuvga erishildi.

Oʻzbekiston elchixona va Migratsiya agentligi koʻmagida ushbu oilaga "Uzbekistan Airways" aviakompaniyasining "Islomobod-Toshkent" yoʻnalishidagi samolyotiga aviachiptalar olib berildi va ular 27 sentabr kuni Vatanga kuzatib qoʻyildi.