Pokistonda Oʻzbekiston boʻylab oʻtuvchi motoralliga start berildi

Islomobod shahrida Pokiston, Afgʻoniston, Oʻzbekiston va Tojikiston boʻylab oʻtuvchi "Central Asia Tour -2025" xalqaro motorallisiga start berildi, deb xabar qilmoqda "Dunyo" AA muxbiri.

Tadbir Oʻzbekiston elchixonasi va Pokiston turizmni rivojlantirish korporatsiyasi bilan hamkorlikda tashkil etildi.

Tadbir qatnashchilari tomonidan ushbu tashabbus mintaqaviy hamkorlikni rivojlantirish, xalqlar oʻrtasidagi doʻstona aloqalarni mustahkamlash va mamlakatlar sayyohlik salohiyatini keng targʻib qilishga qaratilgan muhim qadam sifatida eʼtirof etildi.

16 nafar sayohatchidan iborat motoralli ishtirokchilari joriy yilning 1 avgust kuni "Islomobod–Peshovar" yoʻnalishi boʻylab yoʻlga chiqdi. Dasturga muvofiq, ralli ishtirokchilari 23 kun davomida Pokiston, Afgʻoniston, Oʻzbekiston va Tojikiston orqali oʻtuvchi 5000 kilometrdan ortiq masofani bosib oʻtadi.

Xususan, ular Oʻzbekistonning Termiz, Samarqand, Buxoro va Toshkent shaharlarida boʻlib, oʻzbek xalqining boy madaniyati va mehmondoʻstligi bilan tanishadi.

Shuningdek, motoralli qatnashchilari boʻlgan sayyohlar Oʻzbekistonning boy madaniyati, tarixi va sayyohlik salohiyati haqida turkum videokontentlarni suratga olishni rejalashtirgan.