"Qizlar maktabga doim kechikib kelgan". Andijondagi maktabda sodir boʻlgan holat yuzasida tushuntirish berildi

Mazkur holat haqiqatdan ham 12 sentabr kuni Andijon shahridagi 5-maktabda yuz bergan. Oʻsha kuni maktabning 10-sinfida tahsil olayotgan oʻquvchi qizlar maktabga soat 9:20 da kechikib kelgan. 

Munosabatda yozilishicha, qizlar muntazam darsga kech qolib kelgan, shuning uchun ham maktabning masʼul xodimi D.T. tomonidan oʻquvchilar tartibga chaqirilgan (oʻtirib-turgʻizilgan). 

"Ushbu holat maktab direktori tomonidan nazoratga olinib, oʻquvchilar darslarga kiritib yuborilgan hamda oʻquvchilarning ota-onalari bilan dars jarayonlari 8:00 dan boshlanishi, ushbu vaqtda oʻquvchilarni maktabga kelishlarini taʼminlash zarurligi yuzasidan suhbat olib borildi", deyiladi munosabatda. 

Shuningdek, unda maktab direktori tomonidan maʼsul xodim D.T. bilan tushuntirish ishlari olib borilib, unga nisbatan intizomiy chora qoʻllanilgani haqida soʻz boradi. 

Bu holat boʻyicha Bolalar ombudsmani ham munosabat bergan edi. Unda bunday nomaqbul harakatlar javobsiz qolishi mumkin emasligi bildirilgan. 

"Taʼlimdagi tartib-qoidalardan chetga chiqib, oʻquvchilarga nisbatan turli jazolash usullarini qoʻllash hamda bolani ommaviy izza qilish uning shaʼni va qadr-qimmatini poymol etadi — bu bolaning konstitutsiyaviy huquqlarini buzishdir", deyiladi unda.