Qurilish vazirligi binosi 182,5 mlrd soʻmga sotildi

Savdo 130,3 mlrd soʻm boshlangʻich narx bilan boshlanib, 8 qadamda, 1 soat 7 daqiqa davom etdi. Yakunda eng yuqori taklif bilan “O‘zshahar qurilish invest” MChJ gʻolib boʻldi.

Sotilgan bino Abay koʻchasi 6-uyda, 0,5 gektar yer maydonida joylashgan va umumiy maydoni 11 725 kv.m. Lot shartlariga koʻra, xaridor binoda ofis va xizmat koʻrsatish faoliyatini yoʻlga qoʻyishi lozim.

Qurilish vazirligi Yangi Toshkentga koʻchib, Transport va Suv xoʻjaligi vazirliklari bilan bitta yangi binoda joylashishi avvalroq maʼlum qilingan edi.

"O‘zshahar qurilish invest" haqida:
Korxona 2017 yilda davlat tomonidan tashkil etilgan va turar joy binolarini qurish bilan shugʻullanadi. 2024 yilga qadar kompaniyaning 90% ulushiga Davlat aktivlarini boshqarish agentligi, 10% ulushiga “Qurilish Invest Development” MChJ egalik qilgan. 

Keyinchalik xususiylashtirilgan va 2025 yil 16 dekabr holatiga Qodirov Nuriddin Toʻyiyevich korxonaning yagona taʼsischisi hisoblanadi.