Mirziyoyev Gurbanguli Muhammedov bilan uchrashdi

Uchrashuvda Oʻzbekiston–Turkmaniston oʻrtasidagi strategik sheriklikni mustahkamlash, savdo-iqtisodiy hamkorlikni kengaytirish, energetika, transport, qishloq va suv xoʻjaligi sohalarida qoʻshma loyihalarni amalga oshirish masalalari muhokama qilingan.

Davlat rahbarlari ikki mamlakat oʻrtasidagi savdo hajmi yil boshidan beri 700 million dollarni tashkil etganini qayd etgan. Fevral oyidan boshlab erkin savdo rejimi amal qilmoqda, poytaxtlarda savdo uylari faoliyat yuritmoqda. Shuningdek, joriy yilda “Shovot – Toshovuz” savdo zonasini ishga tushirish rejalashtirilmoqda.

Muzokaralarda boʻlajak oliy darajadagi uchrashuvlarga tayyorgarlik, hukumatlararo komissiyalar, Ishbilarmonlar kengashi yigʻilishlari va madaniy tadbirlarning samarali oʻtkazilishi muhimligi taʼkidlangan.

Suhbat avvalida Gurbanguli Berdimuhamedov prezident Mirziyoyevga Turkmaniston prezidenti Serdar Berdimuhamedovning salomi va ezgu tilaklarini yetkazgan. Oʻzbekiston prezidenti esa turkman xalqini yaqinda Avazada boʻlib oʻtgan BMT konferensiyasini muvaffaqiyatli oʻtkazgani bilan tabriklagan.

Shuningdek, tomonlar Markaziy Osiyo davlatlari rahbarlarining boʻlajak Maslahat uchrashuvi va “Ozarbayjon – Turkmaniston – Oʻzbekiston” formatidagi uch tomonlama muloqot ahamiyatiga ham toʻxtalganlar.