Zelenskiyning taklifi Putinga yetkazildi – Kreml

Juma kuni Kreml matbuot kotibi Dmitriy Peskov “Izvestiya” nashriga Ukraina prezidenti Volodimir Zelenskiyning ochiq murojaati haqida Rossiya prezidenti Vladimir Putin xabardor qilinganini ma’lum qildi.

“Ha, kechasiyoq biz (Putinga) uning yozma nusxasini topshirdik. Ommaviy axborot vositalaridan kelgan ma’lumot prezidentga yetkazildi va u buni ko‘rib chiqadi. Prezidentga axborot berildi”, — dedi Peskov.

Zelenskiy payshanba kuni Putinga ochiq xat e’lon qildi. Unda urushni tugatish bo‘yicha kelishib olish uchun uchrashishni taklif etib, aks holda Kiyev kurashni davom ettirishga tayyor ekanidan ogohlantirdi.

Shuningdek, Putinni masxara qilib, rossiyaliklar ham undan, ham urushdan charchayotganini aytdi.

Peskovning so‘zlariga ko‘ra, Putin juma kuni tushdan keyin nutq so‘zlashi kutilayotgan Sankt-Peterburg xalqaro iqtisodiy forumi yalpi majlisida ushbu xat yuzasidan izoh berishi mumkin.