Damas va Cobalt yangi qiyofada: “UzAuto Motors” modellar qatorini kengaytirmoqda

Prezident Shavkat Mirziyoyevning joriy yil may oyidagi Xorazm viloyatiga tashrifi chogʻida “Xorazm Avto” korxonasida yangi modellar ishlab chiqarishni yoʻlga qoʻyish va quvvatlarni zamon talabiga moslashtirish vazifasi belgilangan edi.

Shu doirada korxonada kichik biznes va xususiy mijozlar ehtiyojlarini hisobga olgan holda “Damas” modelining yangi avlodi ishlab chiqariladi. Damas Move yoʻlovchi va Damas Max yuk-yolovchi versiyalari taqdim etiladi. Yangi model kengroq, yuqori sigʻimga ega, qulay va iqtisodiy jihatdan tejamkor boʻladi.

Shu bilan birga, kompaniya Chevrolet Cobalt modelini ham tubdan yangiladi. Yangi Cobalt Style MCM va Cobalt Midnight MCM versiyalari ishlab chiqarildi. Ular kengaytirilgan funksiyalar, zamonaviy texnologiyalar, yuqori xavfsizlik darajasi va qulaylik bilan ajralib turadi.

Yangilangan Cobalt avtomobili 12 ta yangi funksiya bilan jihozlandi. Ular qatorida Android Auto va Apple CarPlay’ni qoʻllab-quvvatlovchi sensorli multimedia tizimi, kruiz-kontrol, o‘rindiqlarni isitish funksiyasi, yangi asboblar paneli va eko-charm salon mavjud. Umumiy hisobda 50 dan ortiq asosiy komponentlar yangilandi.

Kompaniya mutaxassislarining maʼlum qilishicha, Cobalt modelidagi keyingi bosqich — avtomobil tashqi koʻrinishini yangilash (feyslift) boʻlib, bu yoʻnalishdagi ishlar boshlab yuborilgan.

Yangilangan modifikatsiyalar mavjud versiyalar bilan bir vaqtda ishlab chiqariladi. Avtomobillar narxlari va sotuv boshlanish sanasi haqida qoʻshimcha maʼlumotlar keyinroq eʼlon qilinadi.