Myunxen Olimpiadasi: sport tarixidagi qora kun

Oʻsha yili 11 nafar isroillik sportchi Falastinning “Qora sentabr” terrorchilik tashkiloti aʼzolari tomonidan garovga olinib, halok boʻldi. Hodisa sobiq Daxau konslageridan 20 kilometr uzoqlikda sodir boʻlgan va qutqaruv operatsiyasi muvaffaqiyatsiz yakunlangan — toʻqqiz nafar garovga olingan shaxs, besh terrorchi va bir politsiya xodimi halok boʻlgan.

Hodisadan soʻng Olimpiya oʻyinlari 34 soatga toʻxtatildi va asosiy stadionda qurbonlar xotirasiga bagʻishlangan marosim oʻtkazildi. Xalqaro Olimpiya qoʻmitasi prezidenti Eyveri Brandeyj “Oʻyinlar davom etishi kerak!” deb eʼlon qilib, musobaqalarni qayta boshlashga qaror qildi.

Amerikalik jurnalist Jim MakKey esa ushbu voqealarni jonli efirda yoritgan birinchi mashhur sport teleradiojurnalistlaridan biriga aylandi. U hodisalarni 16 soat davomida efir orqali uzatib, keyinchalik televideniye sohasidagi nufuzli Emmy mukofotiga sazovor boʻldi.

Myunxen fojiasi nafaqat Germaniya, balki butun dunyo uchun ogʻir saboq boʻldi. Ushbu hodisadan soʻng Gʻarbiy Germaniyada GSG 9, Avstriyada EKO Cobra, Sovet Ittifoqida esa Alpha Group kabi maxsus aksilterror boʻlinmalari tashkil etildi.

Bugun Myunxenda 1972 yilgi Olimpiya oʻyinlarida halok boʻlgan isroillik sportchilar xotirasiga yodgorlik oʻrnatilgan. Ushbu voqea sport tarixidagi eng fojeali terrorchilik hujumlaridan biri sifatida yodga olinadi va xalqaro xavfsizlik hamda professional aksilterror tizimlarining shakllanishiga turtki bergan muhim tarixiy hodisa hisoblanadi.