Suyuq sovun xaridi: ta’lim tizimida 1,1 mlrd so‘mlik mablag‘ talon-toroj qilindi

Samarqand viloyatida maktabgacha va maktab ta’limi tizimida 1,1 mlrd so‘mlik budjet mablag‘lari talon-toroj qilingani aniqlandi. 
Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Departamentning Samarqand viloyati boshqarmasi tomonidan o‘tkazilgan tergovga qadar tekshiruvda viloyat maktabgacha va maktab ta’limi boshqarmasining mas’ul shaxslari 90 ming 863 dona suyuq sovunni qimmat narxlarda xarid qilgani aniqlangan.

Ma’lum qilinishicha, ushbu xaridlar natijasida 1,1 mlrd so‘mlik budjet mablag‘lari o‘zlashtirish yoki rastrata yo‘li bilan talon-toroj qilingan.
Holat yuzasidan Jinoyat kodeksining 167-moddasi — o‘zlashtirish yoki rastrata yo‘li bilan talon-toroj qilish bo‘yicha jinoyat ishi qo‘zg‘atilgan.

Ayni paytda holat yuzasidan tergov harakatlari olib borilmoqda.

Muallif: Hasanboy OCHUN