10-sinf oʻquvchisi BMWda urib ketgan YPX inspektori vafot etdi

Maʼlum qilinishicha,  joriy yilning 25 fevral kuni soat 21:48 atrofida xizmat vazifasini bajarayotgan YPX inspektori kichik serjant Xosilbek Eshnazarovni 10-sinf oʻquvchisi boshqaruvidagi «BMW» rusumli avtomashina urib yuborgan. Hodisa natijasida u hayoti uchun xavfli boʻlgan ogʻir tan jarohatlarini olgan.

Ichki ishlar organlari xodimi shifokorlar nazorati ostida uch kun davomida davolangan. Biroq koʻrsatilgan tibbiy muolajalarga qaramasdan, u vafot etgan.

Ichki ishlar vazirligi rahbariyati va koʻp sonli shaxsiy tarkibi Toshkent shahri IIBB JXX YHXB Yoʻl-patrul xizmati brigadasi 2-bataloni 4-safarbar guruhi yoʻl-patrul xizmati inspektori kichik serjant Eshnazarov Xosilbek Beknazar oʻgʻlining vafoti munosabati bilan marhumning oila aʼzolari va yaqinlariga chuqur taʼziya izhor etdi.

Maʼlumotga koʻra, kichik serjant Xosilbek Eshnazarov 2022 yildan buyon ichki ishlar organlarida fidokorona xizmat qilib kelgan.

Marhumdan qariya ota-onasi, turmush oʻrtogʻi, ikki nafar oʻgʻli va bir nafar qiz farzandi qolgani aytilmoqda.