Buxoroda 5 ishchi kanalizatsiya quvurida oqib ketish natijasida halok boʻldi

Buxoro tumani Bogʻidasht qishlogʻida ehtiyotsizlik oqibatida 5 ishchi kanalizatsiya quvuriga oqib, halok boʻldi. Bu haqda viloyat IIB matbuot xizmati xabar berdi.

Maʼlumotlarga koʻra, hodisa 4 sentabr kuni sodir boʻlgan. Ishchilar Buxoro shahri 7-mikrorayonida qurilayotgan koʻpqavatli uyni Bogʻidasht qishlogʻidagi markaziy kanalizatsiya quvuriga ulash ishlarini amalga oshirmoqchi boʻlgan.

Tergov maʼlumotlariga koʻra, «Fayz binokor Oltiariq» korxonasi xodimlari tegishli ruxsatnomasiz quvur qopqogʻini ochib, ichiga tushgan. Natijada kuchli oqim ularni ichiga tortib ketgan.

Ishchilardan 3 nafarining jasadi «Zarmanoq» mahallasidagi oqova suvlarni uzatgich punkti quvuridan topilgan. Qolgan 2 ishchini qidirish ishlari davom etmoqda.

Holat yuzasidan Oʻzbekiston Jinoyat kodeksi 257-moddasi (mehnatni muhofaza qilish qoidalarini buzish) 2-qismi «a» bandi bilan jinoyat ishi qoʻzgʻatilgan. Dastlabki tergov harakatlari boshlandi.