Deputatlik saylovida muddatidan oldin ovoz berish qachon boʻlishi aytildi

Unda aytilishicha, muddatidan oldin ovoz berish kunlaridagi saylov uchastkalarida ovoz berish vaqti ish kunlarida soat 9:00 dan 18:00 ga qadar, dam olish kunlarida esa soat 11:00 dan 17:00 ga qadar davom etadi. Bundan tashqari, Oʻzbekiston Respublikasining chet davlatlardagi diplomatik va boshqa vakolatxonalari huzurida tuzilgan saylov uchastkalarida muddatidan oldin ovoz berish ushbu saylov uchastkalari joylashgan davlatdagi mahalliy vaqt bilan soat 9:00 dan 18:00 ga qadar amalga oshiriladi. 

Markaziy saylov komissiyasiga koʻra, joriy yil 27 oktabr kuni oʻtkaziladigan saylovda Oliy Majlis Qonunchilik palatasiga 11 nafar va mahalliy kengashlarga 605 nafar nogironligi boʻlgan shaxslar deputatlikka nomzod sifatida roʻyxatga olingan. Saylov komissiyalari tarkibida esa 1343 nafar nogironligi boʻlgan shaxslar faoliyat koʻrsatib kelmoqda. 

Boʻlajak saylovlarda nogironligi boʻlgan shaxslarning konstitutsiyaviy huquqlarini yanada kengroq taʼminlash maqsadida 830 mingdan ortiq nogironligi boʻlgan saylovchilarga koʻmak beruvchi koʻngillilar biriktirilmoqda.

"Nogironligi boʻlgan shaxslarga oʻz saylov huquqlarini amalga oshirishi uchun zarur shart-sharoitlar yaratish maqsadida saylov byulletenlarini toʻldirish uchun Brayl alifbosi asosidagi trafaret namunasini tasdiqlash, saylov uchastkalarida nogironligi boʻlgan va jismoniy imkoniyati cheklangan shaxslar uchun maxsus jihozlangan yashirin ovoz berish kabinalari, optik lupalar (kattalashtiruvchi oynalar) hamda qoʻshimcha yoritkichlar oʻrnatish hamda saylov uchastkasiga mustaqil ravishda bora olmaydigan saylovchilarning saylov kuni turgan joylarida ovoz berishini tashkil etiladi", deyiladi Markaziy saylov komissiyasining navbatdagi majlisida.

Shuningdek, unda Markaziy saylov komissiyasining qarori bilan Turkiy Davlatlar Parlament Assambleyasining 19 nafar, Shanxay hamkorlik tashkiloti, MDH Parlamentlararo Assambleyasi, Rossiya va Xitoydan 2 nafardan, AQShning 3 nafar hamda Buyuk Britaniya, Latviya, Litva, Fransiya, Hindiston va Yaponiyaning 1 nafardan vakillari, jami 36 nafar xorijiy va xalqaro kuzatuvchilar akkreditatsiyadan oʻtkazilgani taʼkidlangan.