Ruslan Chagayev Valuyev bayonotiga munosabat bildirdi: “Kerak boʻlsa, ringga chiqishga tayyorman”

Chagayevning aytishicha, soʻnggi kunlarda unga Valuyevning Oʻrta Osiyo haqida aytgan gaplari aks etgan videolar koʻplab yuborilmoqda. Bokschi dastlab bu videolar sunʼiy intellekt yordamida tayyorlangan boʻlishi mumkin, deb oʻylaganini taʼkidladi.

“Agar bu videolar haqiqiy boʻlsa, Valuyevning aytgan gaplari uchun oʻzbek xalqidan uzr soʻrayman. Balki, ringdagi zarbalarim endi taʼsir qilayotgandir”, dedi Chagayev.

U bu gaplarni hazil tariqasida aytganini, chunki Oʻzbekiston va Rossiya oʻrtasidagi munosabatlar barqaror va ijobiy rivojlanib borayotganini alohida qayd etdi.

Chagayevning fikricha, Valuyevga oʻxshagan ayrim shaxslar shov-shuvli chiqishlari bilan davlatlar oʻrtasidagi munosabatlarga soya solishga urinayotgan boʻlishi mumkin. Shu bois bunday bayonotlarga ortiqcha eʼtibor qaratmaslik kerak.

“Xudo xohlasa, hammasi yaxshi boʻladi. Ammo Valuyevning kallasini joyiga qoʻyish uchun bitta jang kerak boʻlsa, men tayyorman. Va bu safar, jangdan keyin u butun Oʻrta Osiyoni juda yaxshi koʻrib qoladi va bunday bemaza gaplarni boshqa hech qachon gapirmaydi”, — deydi Ruslan Chagayev.