Руслан Чагаев Валуев баёнотига муносабат билдирди: “Керак бўлса, рингга чиқишга тайёрман”

Чагаевнинг айтишича, сўнгги кунларда унга Валуевнинг Ўрта Осиё ҳақида айтган гаплари акс этган видеолар кўплаб юборилмоқда. Боксчи дастлаб бу видеолар сунъий интеллект ёрдамида тайёрланган бўлиши мумкин, деб ўйлаганини таъкидлади.

“Агар бу видеолар ҳақиқий бўлса, Валуевнинг айтган гаплари учун ўзбек халқидан узр сўрайман. Балки, рингдаги зарбаларим энди таъсир қилаётгандир”, деди Чагаев.

У бу гапларни ҳазил тариқасида айтганини, чунки Ўзбекистон ва Россия ўртасидаги муносабатлар барқарор ва ижобий ривожланиб бораётганини алоҳида қайд этди.

Чагаевнинг фикрича, Валуевга ўхшаган айрим шахслар шов-шувли чиқишлари билан давлатлар ўртасидаги муносабатларга соя солишга уринаётган бўлиши мумкин. Шу боис бундай баёнотларга ортиқча эътибор қаратмаслик керак.

“Худо хоҳласа, ҳаммаси яхши бўлади. Аммо Валуевнинг калласини жойига қўйиш учун битта жанг керак бўлса, мен тайёрман. Ва бу сафар, жангдан кейин у бутун Ўрта Осиёни жуда яхши кўриб қолади ва бундай бемаза гапларни бошқа ҳеч қачон гапирмайди”, — дейди Руслан Чагаев.