“Soliq Mobile” orqali 3,2 mlrd so‘m keshbek talon-toroj qilindi

Bosh prokuratura huzuridagi Departamentning Farg‘ona viloyati boshqarmasi tomonidan tergovga qadar tekshiruv o‘tkazildi.

Natijada fuqarolar M.X., M.X. va K.I. o‘zaro til biriktirib, “Telegram” tarmog‘idagi guruhlar orqali 7 ta MCHJga tegishli xarid cheklarini noqonuniy sotish bilan shug‘ullangani aniqlandi.

Ular amalda hech qanday moliyaviy aloqalar bo‘lmagan bo‘lsa-da, go‘yoki 3,3 trln so‘mlik mahsulot va xizmatlar xarid qilinganligi haqida soxta elektron hisob-fakturalar rasmiylashtirib, pullarni onlayn-NKM orqali kirim qilishgan va xarid cheklari chiqarishgan.

Natijada “Soliq Mobile” ilovasi orqali 211 584 nafar fuqaroga keshbek sifatida 28,5 mlrd so‘m hisoblanib, shundan 3,2 mlrd so‘mi to‘lab berilishi orqali byudjet mablag‘lari talon-toroj qilingan.

Holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.