Афғонистонда интернетнинг ўчирилиши Россия ва Эрон билан маслаҳатлашилган — ОАВ

Кобул фуқароси бўлган Халил Эҳсон интернетни тикланиши ҳақида шундай деди: “Энди интернет қайтди, биз Ислом Амирлигини бошқа ёпилишга йўл қўймасликка чақирамиз, чунки интернет бугунги куннинг асосий зарурати”.

“Афганистан International” нашрининг ёзишича, мамлакат етакчиси Ҳайбатуллоҳ Оҳунзода Эрон ва Россия билан маслаҳатлашган ҳолда интернетни узишга қарор қилган. Шундан сўнг, Покистон Афғонистондаги интернет узилиши сабабли “Торхам” ўтиш жойини ёпган. БМТ ва инсон ҳуқуқлари ташкилотлари эса “Толибон” ҳукуматини зудлик билан интернетни қайта ёқишга чақирган.

“Интернетдаги узилиш Афғонистонда банк, божхона, валюта айирбошлаш шохобчалари ва авиарейсларни тўхтатиб қўйди”, — дейилади “Afganistan International” хабарида.

Сиёсатшунос Суҳроб Бўронов ўзининг Telegram саҳифасида ёзишича, Афғонистонда “Толибон” ҳукуматининг интернетнинг бутунлай тўхтатиш қарорини умуман диний мезонлар билан баҳолаб бўлмайди.

“Бу аслида нафақат вужудга келаётган ўткир ижтимоий-сиёсий муаммоларни яширишга уриниш, балки АҚШнинг Баграм базасига оид баёнотлари ортидан қабул қилинган қарор бўлгани тобора ойдинлашмоқда”, — дея ёзади сиёсатшунос.