АҚШ сиёсатига норозилик билдирган 17 мингга яқин мухлис ЖЧ–2026 чипталарини бекор қилди

Мусобақа 2026 йил 11 июндан 19 июлгача АҚШ, Мексика ва Канадада ўтказилиши режалаштирилган бўлса-да, чипталарни бекор қилиш сабаблари спортга эмас, балки сиёсий омилларга боғлиқ экани айтилмоқда.

Сўнгги кунларда тахминан 16 800–17 000 нафар мухлис Жаҳон чемпионати ўйинлари учун олинган чипталарини қайтарган. Улар бу қарорни АҚШнинг ташқи сиёсати, хусусан Венесуэла ва мигрантларга нисбатан олиб борилаётган сиёсатдан норозилик билан изоҳламоқда. Кузатувчилар мазкур ҳолатни турнирга бормаслик орқали амалга оширилаётган рамзий бойкот сифатида баҳоламоқда.

Мухлислар норозилигининг асосий сабаблари сифатида АҚШнинг айрим халқаро сиёсий қарорлари, мамлакатдаги хавфсизлик ва иммиграция сиёсати, шунингдек, фаоллар томонидан ижтимоий тармоқларда тарқатилаётган бойкот чақириқлари келтирилмоқда. Айниқса, АҚШ Миграция ва божхона назорати хизмати (ICE) фаолияти билан боғлиқ ҳолатлар мухлислар орасида хавотирни кучайтирган.

ФИФА мазкур вазият юзасидан ташкилот раҳбарияти иштирокида фавқулодда йиғилиш ўтказишни режалаштирган. Унда чипталарнинг оммавий равишда бекор қилиниши, турнир нуфузига эҳтимолий таъсирлар ҳамда мухлислар хавфсизлиги масалалари муҳокама қилиниши кутилмоқда. Бироқ ФИФА ҳозирча расмий баёнот бермади, фақат вазиятни барқарорлаштириш чоралари кўриб чиқилаётганини маълум қилди.

Шу билан бирга, чипталардан оммавий воз кечиш иккилламчи бозорга ҳам таъсир кўрсатмоқда. Таклиф ошгани сабаб чипта нархлари пасая бошлаган. ФИФА қоидаларига кўра, чиптани осонликча қайтариш имконияти чеклангани учун айрим мухлислар уларни қайта сотувга чиқаришга мажбур бўлмоқда.