Британияда болаларнинг интернетдаги хавфсизлиги бўйича янги чоралар эълон қилинди

Ҳукуматнинг таъкидлашича, ҳеч бир платформа “беэътибор қолмайди” ва хавфли бўлган ҳуқуқий бўшлиқлар ёпилади.

Янги чоралар қуйидагиларни ўз ичига олади:

• СИ чатботлари ва ноқонуний контент: Барча СИ чатбот провайдерлари “Онлайн хавфсизлик акти” доирасидаги қонуний мажбуриятларга амал қилишга мажбур қилинади.
• Ёшга оид чекловлар ва хавфли функциялар: Ижтимоий тармоқларда минимал ёш чегараси белгиланиши, чексиз скроллинг каби болаларга зарарли функциялар чекланиши мумкин.
• Маълумотни сақлаш: Болалар ҳалокати ҳолатларида ижтимоий тармоқдаги маълумотлар ўчирилишига йўл қўйилмайди.

Бош вазир Кир Стармер:

“Технология жуда тез ривожланмоқда ва қонун буни қўллаб-қувватлаши керак. Ҳеч бир платформа беэътибор қолмайди. Биз болаларнинг хавфсизлигини таъминлаш ва ота-оналарга ёрдам бериш учун тез ҳаракат қиламиз", деди.

Шу билан бирга, келаси ойдан бошлаб “Болаларнинг рақамли ривожланаши” консултацияси бошланади, унинг натижалари асосида янги қонунчилик чоралари бир неча ой ичида амалга оширилади.

“Биз болаларни ҳимоя қилиш учун зудлик билан чора кўришга тайёрмиз. Янги чоралар орқали СИ чатботлар ва хавфли контентга қарши самарали ҳаракат қилиш мумкин бўлади”, дея қўшимча қилди Илм, инновация ва технологиялар вазири Лиз Кендалл.

Масъул ташкилотлар ҳам ота-оналар учун “Билмасанг, сўраб ўрган” кампаниясини йўлга қўйди, унда интернет хавфсизлиги, контентни фильтрлаш ва ёшга мос маслаҳатлар тақдим этилади.