Масъулларнинг масъулиятсизлиги боғча болаларининг бошига болға бўляпти

Жорий йил 20 феврал куни заҳарланиш сабабли 70 нафардан ортиқ бола шаҳардаги икки шифохонага ётқизилган, улардан 3 нафари реанимация бўлимида қолмоқда.

Маълумотларга кўра, айрим боғчаларда овқатланиш тизими кейтеринг асосида ташкил этилган. 2024 йил 25 июлдаги қарор билан Қувасой шаҳрида давлат боғчаларида кейтеринг тизими жорий қилинган ва овқат тайёрлаш ҳамда етказиб бериш бўйича хусусий корхона таклифи маъқулланган.

Бу ҳолат илк бор кузатилаётгани йўқ. 2025 йил сентябр ойида Тошкент вилоятининг Пискент, Бўка, Бекобод, Қуйичирчиқ ва Оққўрғон туманларида жами 1922 нафар тарбияланувчи овқатдан заҳарланиш аломатлари билан шифохоналарга мурожаат қилган эди. 

Шу ҳолат юзасидан Жиноят кодексининг 257-1-моддаси 1-қисми билан жиноят иши қўзғатилган.

Шунингдек, 2025 йил октябр ойида Жиззах вилояти Фориш туманидаги тўртта давлат боғчасида ҳам 40 нафарга яқин бола овқатдан заҳарлангани аниқланган.

Мутахассислар таъкидлашича, ҳар сафар бир хил сценарий такрорланмоқда: заҳарланиш, комиссия тузиш, баёнотлар ва назоратни кучайтириш ҳақидаги ваъдалар. Бироқ тизимли муаммолар ўз ечимини топмаяпти.

Масала фақат айрим раҳбарларни алмаштиришда эмас. Боғчаларда озиқ-овқат таъминоти занжирини тўлиқ қайта кўриб чиқиш зарур: маҳсулот етказиб берувчиларни танлаш, тендер жараёнларининг шаффофлиги, санитария назорати ва масъул шахсларнинг жавобгарлиги кучайтирилиши керак.

Болалар саломатлиги - энг устувор масала. Мактабгача таълим тизимидаги оммавий заҳарланишлар тасодиф эмас, балки чуқур тизимли муаммолардан далолат бермоқда. Саволлар очиқ, жавоблар эса амалда намоён бўлиши керак.

Муаллиф: Мафтуна Бахтиёрова